Vasaliņka, muna dōrgiņkō! Kai tī pi jyusu, Calipornejā, dzelenis, Ceciļ? Krūņa vērss vēļ besejās? Pi myusu – rāms, kai izrōmeits. Pat gudreibas beņči šūnedeļ beja nu divanim izleiduši iz sēdēšonu Saimē.. ar uzpurneišim i bez tim. Viņ kuļturu i ticeibu tō kōvēja grūžūs tur i koncertu, teatru zalūs metrus skaita, taipoš kai Aglyunē.. Padūmoj tik, kur lelajā laukumā iz Krystaceļu 50 tyukstūši i vairōk ticeigūs sagōje, šūgod ļōve tikai 3 tyukšim i ar beletim. Moš nu baiļu, a moš aiz kauna tikai pusūtrs tyukstūts bejs. Mes to obejas ar Zosi Krystaceļu pi teļapurņa gōjam, osoras byra… Myužeigs skaistums! Ceceit, tod jau kuļtura i ticeiba – vyslipeigōkōs? Zose viņ citej Trasunu, par ticeibu, par kuļturu i purp: “Kur myusu cylvāktīseibas?” Myužeigs skaistums! Mes to nikur tōli ļaudīs i nasavolkojam, vokorūs iz bazneiceņu aizklidzinejam, kod Dīva noms patukšs.. Dēļ tō reitūs ar vāzom steberejom pa ļūbnōm mikrorajona ūļneicom. Ka nu sātas izej eistajā stuņdē, tai pēc sešim, vysaidus ekskļuzyvus var īraudzeit. Viņdīn laidamēs raugūs gar Zīmeļblāzmu. Myužeigs skaistums! Tūreit tai slōbonai nūvāzōjam, bez slapņom mugorom. Es kačeišus barōju, a Zose, kai slyma, ar sovu mobilū kameru fotostrāčes giustēja. Tukšūs butelku beja da besa, i zōleitē, i autobusa pīturā, i bedrē. A tamā bedrē – myužeigs skaistums! Patēm biļdē! Raibs kačeits pi tukšas buteļceņas zakusku meklēja. Es jam bedres molā sauveiti pabēru.. Zīmeļblāzma to kai kuļturas piļs. Tī seniori, nu pandeima atsačukavōjuši, pa druskai jau sōkuši metrōtīs. Ražas svātki byušūt. Sābrineica stōstēja, ka kotrs ar sovu izaudzētū dyžōsīs. Jōīt vārtūs, kaids myužeigs skaistums karantinas laika dōrzūs izaudzis. Apleicīne tai pilei vēļ nav da gola pabeigta. A jauns smuks beņčeits prīkšejā planā jau apķēzeits. Myusu syuda brōļs voi ta prūt smukumu nūvērteit. Nikaida pasēdēšona nasagōja. Vāzōm viņ tōļōk. I te – myužeigs skaistums! Zosei – vāzas zemē i kamera jau rūkā. Pi kaida pakša dzeiva biļde kai klusō doba – divu metru kaktuss ar bolūdi zorūs. Dūmōju, ka sasapinīs, pastīpu rūku, a mīra putyns aizalaide. Labi, ka Zose paspēja nūbiļdēt. Ceceit, šudiņ beigšu. Puļgeņce myusus ar Zosi iz teatri šūvokor vad. Cikom kuļtura vēļ nav galeigi izneideita, jōgiun, kū var.
Tova PLŌCIŅU MASE
2020. goda 7. septembrī Rāznē
Zoses biļdes
Комментарии