Vasala, meilō Maseite, myužeigi naveistūšō myužeigō skaistuma pučeite! Gribu Tevi pasveicynōt i nūvēlēt Tev i visim “Vēsteišu” drukavōtōjim prīceigus Zīmassvātkus i laimeigu Jaunū 2018. gadeņu.
Lai Jyusim visim stypra veseleiba, ļusteigs prōts i sadereiba! Lai vysod pīteik drūsmes i pacīteibas ari turpmōk vēsteit patīseibu, kai vysu laiku tū asat darējuši! Taipat esit izpaleidzeigi ciļvēcenim, kuri lyugs nu jyusu paleidzeibu. Varonais Dīvs par tū jyusus bogōteigi atolgōs.
Vysai itai nakrītneibai, kas tagad te pasaulē dorōs, tyvojās brīsmeigas beigas, jo Dīva pacīteibas mārs dreiži byus pōrpiļdeits. Taisneiba pōrjims pasauli, un visi byusim laimeigi.
Tagad drukavōšu par savu dzeivōšonu. Dzeivōšona maņ te ļūti loba, jo myusu gimineitē vīns ūtru cīnej i atbolsta. Ari ciļvēceni, kas te apleicīnē dzeivoj, ir laipni i izpaleidzeigi.
Bīži pi myusu atīt Mareite Rutule un Viļneits Volks, koč i nīka naudeņu nūpeļnej, vysod atnas kaidu gastiņci. Visi pogosta činavnīki ir laipni, veikalu tērgōtōjas atsauceigas.
Ja kuram pītryukst naudeņas leidz olgai, īdūd maizeiti iz porōda. Gudra un ļūti zynūša ir gimines ōrsteite, izpaledzeigas aptekas darbineicas: ja kuram lela vajadzeiba un naspēj aizīt iz apteku, atnas zōleites iz sātu.
Pi myusu ir ari bars, kur goldus klōj ar vysaidim gordim ēdīnim. Dzērdēju, Maseit, ka Rāznes “Gorā” koncertēs myusejūs Igauņu gimineite. Aizej nūteikti, nanūžālōsi.
Vēleju jyusim visim sovā i leidzcylvāku vōrdā stypru veseleibu un pīdzeivōjumim bogōtu Jaunū godu!
Tev, Maseit, lyugums — bīžōk roksti Ceceitei vēstuleites, a Vaušeits lai vairōk zeimej.
Lai Dīveņš dūd, ka jaunajā godā kotrā sātā īnōk itei vērteigō avīzeite, kuru izlosūt var vysu zynōt par sovu pusi i par tū, kas dorōs pasaulē.
L. KOLNEJA
Komentāri