Vasala, Plōciņu Maseit!
Satyku Pļapatunu Donetu, un es iz reizes uzdevu vaicōjumu: “Donet, kū tu saceisi par tū, kū es nu cylvākim dzērdēju, kuri (nazynu pat eisti) klausejōs radio vai vērēs televizoru, bet dzērdēju, lyuk, kū. Cylvāki vēļ vīnu reizi naasūt vakcinēti, bet nōkamā godā tū jau byus jōdora pa trešai reizei?”
Donets saceja: “Pīter, cik tu gudrs esi, tikpat ari es. Nav dyumu bez guņs. Ej nu sazini. Izaverās, ka šamā gadejumā itys viruss dorbojās kai gripa, kurai kotru godu pūteišona jōsōc nu jauna, bet mes vēļ nazynom, cik ilgi itei pūte dorbōsīs. Trešajūs Zīmassvātkūs Latvijai tyka pyrmōs vakcinas. Cytur jau pūtēja agrōk. Jau pusgods apļeik, bet vēļ nav nikas pēc pūtem saslimis. Vysmoz nav dzērdāts. Bet varbyut godu tei vakcina dorbojās, suņs jū tagad lai sazyna.”
Tod es Donetam vaicōju: “Kū tu dūmoj par pašvaļdeibu reformu?”
Donets saceja: “Daudzi īprīkš škēlēs mozōs pašvaļdeibōs, bet tyka runōts par lelom. Tys natyka panōkts, bet tikai pōrrunōts. Tagad pi lelom atsagrīze otkon. Tikai na vysur. Par tū, ka dūmoj, ka tam mozajam nūvodam vairōk naudeņas īdūs, navys kai tys eisti ir, teik tam lelōkajam. Šamā gadejumā Rēzeknes nūvods gudri nūstrōdōja, atsadaļējōs tikai Viļānu nūvods. Cik daudzim cylvākim pēc itōs reformas navajadzēs maineit adresi. Na tai kai tīm mozīm nūvodym, kurus savīnoj otkon kūpā ar citim lelōkīm. Bet tei nūvodu palelynōšona nanūtyka iz reizes dēļ tam, ka par kotru reformu kaut kam kaidi eiro īrypoj kabatā. Jim ari vajag kū nūpeļneit. Vaļsts izveidōta, lykumdūšona nūstyprynōta, bet vajaga kaut kū dareit naudeņas rypōšonas lobā. Vai na tai?”
“Donet,” es vaicōju tōlōk, “kū tu soki par itom vēlēšonom?”
Donets atbiļdēja: “Vaļsts radio un televizijā nu jaunō goda vairōk nāpōrraida nikaidu reklamu. Vaļsts raideitōjūs beja tikai bezmoksas agitacija. Puļceitīs un uzdūt vaicōjumus partijom navarēja. Tai kai Saeimā beja īnōkuši jauni spāki, tod tagad vacī spāki beidōs zaudēt sovus krāslus. Kaut kai nūvodūs jōsaturīs. Nōkamō goda oktobrī jau Saeima otkon tiks vēlēta. Dēļ tō itōs vēlēšonas beja kai mozais mēginōjums pyrms lelajom vēlēšonom.”
Tai myusu saruna beidzēs.
Pļōpu Pīters
Komentāri