“Taidu oku,
Kurā iudiņa navā,
Viņ vīna vīneiga mīlesteiba,
As atrodu tevī.”
(O. Kūkojs “Mīlesteiba, Lelais Līpu kolns”)
Šūgod 23. decembrī dzejnīkam, publicistam, mōkslinīkam, muzeja specialistam, režisoram, aktīram, J. Soikāna Ludzas mōkslas skūlas dybynōtōjam, sabīdriskajam un kulturas darbinīkam, Latgolas patriotam Ontonam Kūkojam (1940–2007) palyktu 80 godu. Lai gūdynōtu jubilaru, J. Soikāna Ludzas mōkslas skūla un bīdreiba “Teātris azotē” ir kērušās pi vērīneiga projekta “Iesōkumā beja vōrds. A. Kūkojam – 80” eistynōšonas. Pyrmom kōrtom šūgod tiks pōrizdūts Ontona Kūkoja 1995. godā publicātais dzejas krōjums “Mīlesteiba, Lelais Līpu kolns”, jō tys beja mozā tiražā un jau klivis par bibliografisku retumu. Taču pōrizdūtajā grōmotā plānōts īkļaut ari 12 dzejūļus Braila rokstā. Grōmotas redaktore ir dzejnīka mozmeita Katrīna Kūkoja, korektore – Maruta Latkovska, īvodvōrdus roksta Ilga Šuplinska un Janīna Kursīte. Par dizainu rūpejās Sandra Vorkale, bet dzeju Braila rokstā pōrlīk Anete Enikova. Vīnlaiceigi teik īstudeita ari izrōde, kur caur O. Kūkoja dzeju teik izdzeivōts sīvītes un veirīša mīlasstōsts. Izrōdē pīsadolās muzikis un aktīrs Kristaps Rasims un nadzērdeigō aktrise Jolanta Znotiņa. Izrōdes režisore – Marika Čerņavska. Filmej Māris Justs. Izrōdi varēs redzēt ari videoversijā. Leidz ar tū projekta eistinōtōji grib padareit Kūkoja dzeju pīejamu nadzērdeigim un naredzeigim cylvākim. Pōrizdūtō grōmota “Mīlesteiba, Lelais Līpu kolns” byus atrūdama Latvijas Nacionalajā bibliotekā, Latvijas Naredzeigūs bibliotēkas (LNB) filialēs Reigā, Rēzeknē, Balvūs, Cēsīs, Daugavpilī, Jelgavā u.c., Latgolas piļsātu un skūlu bibliotekōs.
Комментарии