Vasala, Maseit! Otkon satyku Donetu. Ari šūreiz navarējam iztikt bez dūmu apmaiņas.
Sōka Doņs: “Varātu jau saukt cylvākus un jūs nadorbus eistajūs vōrdūs. Tikai apnicis pōrōk nūpītni runōt. Jo tū tai mes dareitu, tod laikam leidz avīzei taidas vēstules vyspōr nadaītu. Jau tai apsarībīs par vysaidom najēdzeibom mēli kuļsteit, ka tī byutu vasala vēstuļe, pylna ar nacenzeitim vōrdim. Kas tōļōk nūtyktu? Pēc taidas vōrdu pōrmaiņas ari pošim byutu dryums skots iz dzeivi. Nu bet kam tys vajadzeigs? Taida naloba burčēšona sovā koktā. Pi tam nivīns par tū pat nauzzynōs.
Bet, kod pasasmejomēs, pošim vīglōk un citim lobōk. Var vēļ kū sovaižōk pagveļzt. Kai soka, problemu apskateit nu vysom pusem. Voi na tai, Pīter?”
“Pareizi, Donet! Tikai na vysod myusim cīši smīkleigi saīt. Laikam jau tōs pošas nūpītneibas dēļ. A kū ža tu padareisi. Taida tei dzeive. Bīži vīņ tī ir tai saucamī malnī jūki.
Nu mes smejamēs par budžeta maisa caurumim, bet tymā pošā laikā cik daudzi cylvāki myusu vaļstī navar saviļkt golus ar sovu mēneša naudeņu. Niuļa kleist taidas kai prīceigōkas ziņas. Nōkušō goda budžets byušūt vyslelōkais, kai pastōv atjaunōtō vaļsts.
Donet! Moš itys budžets byus bez cauruma? Voi ar pavysam mozu caurumu maisā?”
Plōciņu Maseit! Tys byutu myužeigs skaistums! Budžeta maiss bez cauruma!
Pļōpu Pīters
Комментарии