Kōrtejū reizi Latgolas Kulturas centra izdevnīceibā iznōkušōs godagrōmotas “Tāvu Zemes Kalendars” un “Olūts”, gaideitas un ar interesi izlaseitas, jo izdevējs Jōņs Eļksnis nakrūpļoj latgalīšu volūdu. Šeit skaidra un saprūtama ir volūda “kai yudiņs olūtā”.
Ari myusu avīze “Rēzeknes Vēstis”, paļdis Dīvam, nav saslymuse ar šū sārgu un natracynoj sovus laseitōjus, jo tai ir styngrs mugurkauls, avīzes volūda ir na tikai taisna, bet ari pareiza.
Par sevi dūmoju: “Līcīs mīrā tu, dullō Paulīne! Nasakosīs!” Bet nikō – maņ tys “rupucs” nadūd mīra un tracynoj. Un es otkon mynu iz tō pōša grōbekļa, kas maņ kōrtejū reizi sōpeigi ībeļž pa pīri. Un maņ raudīņs nōk, kod es radzu un dzēržu, kai myusu volūda pōrsavērš gondreiž voi par cytplanetīšu volūdu. Dīmžāl tei “skaidrō volūda” un tys “teirais olūts” ir galeigi izseicis. Tei tik teišam ir sārga, kas īsamatuse myusu raksteibā. Voi tū var izōrstēt?
..Pōrlosu maņ raksteitōs mameņas vēstules. Tī ir pagōjušō godusymta sešdasmytī godi. Cik skaidra un saprūtama volūda!
Es grybu pavaicōt, dēļ kō daudzi tautā pazeistami latgalīši nacīnej sovu dzymtū mōtes volūdu? Varbyut jim ir dūma tū vyspōr izskaust? Tōs tak ir myusu saknes!
Storp cytu, kod žurnalā “Katōļu Dzeive” sōka pasarōdeit roksti ar rupuceiti “uo”, es tūs, prūtams, nalaseju.
I. DVORECKA
P. S. Maņ rodōs interese par I. Spergas grōmotu “Dzeiveiba”, kas uzraksteita latgalīšu volūdā. Bet, kod īsaskatēju tekstā un īraudzēju jaunū raksteibu, muna interese par šū grōmotu zuda.
Lyugums tim, kuri kuļtivej “uo” (nūsauču tū par rupuci). Cīnejamī rakstnīki un žurnalisti! Ja naasot spējeigi nūreit itū “rupuci”, lyudzu, narokstit latgaliski! Rokstit literarajā volūdā!
Mes, parostī mērsteigī jyusu laseitōji, jyusus saprassim un laseisim bez stresa. Kai saceja P. Pinkāns sovā rokstā: “Myusus navajag tracynōt.”
I. D.
OI, OI, OI! GLŌBIT!
Oi, oi! Cik daudz raksteits par itū volūdas genocidu – “jaunatklōtū Ameriku”. P. Pinkāna vōrdi otkon uzplēš vacōs bryuces.. Kur rast juridisku atbolstu? Varbyut grīztīs pi Vaļsts prezidenta? Jōpaspēj glōbt, cikom vēļ asam P. Stroda gramatikas nūvērtētōji…
Cik atvīglōti bejom 50-tajūs godūs, kod atcēle “ch”, vīnkōršōja gramatiku: vōrdus “chrestomatija”, “kolchozs” u.c. varēja raksteit “hrestomatija”, “kolhozs”.. Vysōs lītōs un vītōs lītdereiga taču ir racionalizacija, navys ūtraižōk. Bet te breinums patīsi, kai itys “vuovuļuošonas” stulbums varēja tik tōli nūnōkt.
Pavaicojit jebkuram laucinīkam – taidu murgōjumu napījimtu ni myužam!
Profesorei L. Leikumai, tik radūšai personeibai, byutu jōīsaklausa vaļsts literarōs volūdas skaņōs – oga, ola, plosts, posts. Vai tod naskaņ bez tō līkō burta pīkabynōšonas? Un nateik tak raksteits uoga, uola, pluosts, puosts…
Tikpat nagativa ir ari raidejuma “Kolnasāta” vadeitōja un daudzu cytu volūda… Kai lai komentej V. Lukaševiča saceitū “prozamūdu”?! Un daudzus cytus vōrdus. Taidā manīrē var vaicōt: voi projōji atvaļinōjuma laikā vysus rodus, voi projōji ari sīvasmōti ?! Taidā mēlē var runōt ar sovu babu, navys oficialūs medijūs.
Mēginōju rast atbiļdi Latvijas Radio 1 – naasūt latgalīšu volūdas kontroles.
Cīnejamais Streiča kungs gon raidejumā “Kolnasāta” prota aizrōdeit, pamōceit, dīmžāl nasekmeigi…
Myusu, Varakļōnu pusē teiri pareizi runōjūšīm ir kauns un napatyka dzērdēt un laseit myusu izkrūpļōtajā dzymtajā volūdā…
Dzymtōs volūdas entuziasti, reikōsimēs! Ir pādejais laiks!
Dzidra BRUZGULE
Bokānūs
Комментарии