Vasala, Plōciņu Maseit!
Itū reizi, kod satyku Pļapatunu Donetu, es jam sōku stōsteit: “Donet, tu pīmiņi, ka Gorbačova laikūs, kod jau Atmūda vēl tikai sōcēs, strōdnīki sajēme daudz lelōku olgu nakai tī, kas sēdēja kantorī? Bet kas nūteik tagad?”
Donets atbiļdēja: “Zini, Pīter, tī beja pavysam cyta laika cylvāki. Tūreiz vēļ kantorūs tikai piļdēja tū, kū lyka dareit. Bet tagad Vaļsts kontrole atroduse ikdīnas penseji tīm, kas divejas reizes pēc kōrtas nūstrōdōjuši par pošvaļdeibas deputatim. Sajem jī 816 eiriku. Tauta jau seņ tū zynōja. Itys vyss atgōdynoj Krīviju. Vysupyrms cylvāki sōc runōt, tod tū atklōj Vaļsts kontrole. Tys ir nu Kučinska un zaļūs zemnīku vaļdeišonas laikim, kod tyka pījimts taids lykums. Tūlaik ari nūtyka pašvaļdeibu reforma.”
Es Donetam vaicōju: “Kō to tagad vyss tai maiņējīs? Tī, kas gryuši strōdoj, sajem tik moz, bet, kas pi varas pabejuši, tik daudz?”
Donets atbiļdēja: “Nu kū tu padareisi? Lai pašvaļdeiba strōdōtu, tu zini, kaida slūdze tī ir? Na vīnu sērmu motu dabōsi, vysas acis izmaitōsi, sēžūt pi datorim. Var pat par duraku palikt. Tī taids gryuts un šausmeigs dorbs, ka tu navari īsadūmōtīs. Naudeņa tai jōsadola, lai koč cikai sovā kabatā īlyktu. Un vēl vysaidi Eiropas projekti.
Eiropu tai vīglai naapšmauksi. Cīši verās, kur vyss paļīk. Bet gribīs to sovā kabatā kū īlikt. Te ir tei dūmōšona, kas pat pa naktim naļaun mīreigi gulēt. Tai cylvāks nūkolpoj, ar daudz švakōku veseleibu palīk, leidzeigi kai sovu laiku nūkolpōjusi vaca, izdyluse un sapleisuse trauku mozgojamō lupota. Tī cylvāks nūsamūkōs vēļ gryutōk kai armijā. Pi tam tī mozkusteigs dzeivesveids. Vysur tikai ar mašinom braukoj. Kai vēļ naīdūmoj ustobu īkōrtōt tai, ka nu gultas sāstūs mašinā un aizbrauktu leidz mōjeņai ar sirsneni durovōs.
Cik pēc taidas braukōšonas par samaitōtu veseleibu ōrstim jōmoksoj. Ka vyspōr var cylvāku izglōbt? Pīter, taids tys ir pašvaļdeibas deputata dorbs.”
Nu, Plōciņu Maseit, pēc itō komentara maņ pavysam vairs nabeja kū saceit. Tikai acis īsaplēta un mute palyka vaļā. Dūmōju, voi vysu var raksteit.
Palīc vasaļiņka, leidz cytai reizei!
Pļōpu Pīters
Комментарии