Preiļu piļs parka teritorijā
atsarūn pēc Preiļu grafa Jozefa Heinriha Borha pasyutejuma 1817. godā byuvētō kapela. Tei pēc izskota ir analoga Varakļānūs asūšai kapelai, jo āku projektātōjs ir vīns un tys pats – itaļu arhitekts Vinčenco Macoto, Borhu draugs. Sōkūtnēji kapela beja izmontōta kai bazneica, tod kai lyugšonu telpa. Zam kapelas atsarūn pogrobs, kur beja īreikōtas kapenes grafa Borha gimines lūcekļu apglobōšonai. Dīmžāl 1919. godā boļševiki, dūmojūt, ka tī paslāpts zalts un dōrglītas, vysu izdemolēja. Borhu kapenēs mērsteigūs atlīku vairs nav. Padūmju godūs pogrobs, lai tī nivīns naleistu īškā, beja aizbērts ar gružim, kapela ari nasadorbōjōs. Agrōkais kapelas interjers ari nav sasaglobōjīs. Tagad šei kapela pīdar Preiļu bazneicai, kū jei deviņdesmytajūs godūs ir atgivuse sovā īpašumā un pīškeiruse tai Vyssvātōkōs Jaunovas Marijas Debesīs uzjimšonas kapelas nūsaukumu. Kapelā ir Dīvmōtes Dabasūs uzjimšonas oltorglezna. Tōpēc 15. augustā, kod Aglyunā ir svātki, ari kapelā vokorā nūteik dīvkolpōjums. Kapelu rūtoj renesanses laikmeta pasaulslavenu mōkslinīku Rafaela, Rembranta, Botičelli un cytu gleznōtōju dorbu kopijas, kū veidōja Mōkslas akademijas studenti. Tōs ir skaistas lelformata gleznas par Bībeles tēmu. Taipat skaists rūtōjums ir gipša skulpturas, kuras dōvynōjuse latvīšu tālōtōjmōkslineica Evi Upeniece, jōs saknes ir meklejamas Preiļūs. Preiļu muižas kapelu var apskateit turisti. Gide Irēna Kjarkuža, kas voda ekskursijas, tod kai ūdzeņu uz tortes dōvoj sovu dzīdōšonu kapelā, jo tī ir ļūti loba akustika. Taipat kapela teik izmontōta bazneicas vajadzeibom, te nūteik izvadeišonas, izskaņ goreigōs muzikas koncerti. Kapelā atrūnama ari informacija, ka Preiļi nu 1382. leidz 1561. godam kai lēnis pīdarēja Borhu dzymtai, vīnai nu Livonijas muižnīceibas un bruņinīceibas pazeistamōkajom dzymtom. Bet nu 1563. leidz 1866. godam Preiļi beja Borhu dzymtas īpašums. Tod 1866. godā Mihails Borhs (1806–1881) Preiļu mīstu, Preiļu un Sondoru muižas par 192 549 sudobra rublim pōrdeve Lelbritānijas pavaļstnīkam Johanam Heinrikam Frederikam, paturādams sev tikai kapelu. Tai ka ir vērts aizbraukt uz Preilim un apsaskateitīs vysu pošim uz vītas – kapelu, izstaigōt skaistū Preiļu piļs parku, nu ōrpuses apskateit restaurātū Preiļu pili.
Aija MIKELE-STRUŠELE
AUTORES foto
Комментарии