Vasaliņka, meilō Maseit, myužeigō skaistuma pučeit!
Nu kai es varu napasakvāleit, kai pavadēju vacū gadeņu i kai jaunū sajēmu. Varu nu sirds dziļumim pasateikt Gaigalovas pogosta darbinīkim par dōvonom. Lelu pōrsteigumu sagōdōja dōvonu iznosōtōji pa mōjom. Trejs jaunītes, kuras myusim pasnēdze dōvonas, tik aizkustynūšus vōrdus pasaceja, ka pat prīka osoras nūbyra. Paļdis Dīveņam, ka pi myusu ir tik loba un apzineiga jaunōtne!
Pyrms daudzim godim bejom ari mes tikpat jauni, izveiceigi, bet Dīva lāmumam nivīns naspēj pretōtīs, kotram ir lamts nūvacōt, lai kaidim naudas maisim tu byutu apsakrōvīs. Redzi, meilō Maseit, pi Dīveņa volda taisneiba: ja jōnūvacoj, nikaidi smiņki napaleidzēs; ja jōmērst, ni ar kaidu naudu naatsapērksi. Ka pi Dīveņa byutu tai, kai itamā grāku pylnajā pasaulē, tod bogōtī dzeivōtu myužeigi, bet nabadzeigīm byutu jōmērst naskaitamas reizes.
Meilō Maseit, nūdūd, lyudzu, sirsneigu paļdis mōkslineicai par gleitū kalendari, ar kū “Vēstis” myusus kotru godu apgōdoj. Lai zeimētōjai laimeigs gods, lai stypra veseleiba, lai pīteik pacīteibas i zeimuļs nanūdylst, rysavojūt kinkeļus!
I vēļ, meilō Maseit, lyugšu tevi, paprosi Reginas kundzei, varbyut jei zyna kaidas zōleites nu insulta. Mani tei nalaime pīmeklējuse, staigoju kai pīdzāruse, kotrā mirklī varu pakrist. Kod raksteisi Ceceitei vēstuli, cīši nasakvālej par myusu dzeivi, cytaižōk amerikani vēl praseis nu myusu kompensaciju par atbreivōšonu. A kur lai tū kompensaciju izraun? Poša tak redzi, cik naudas aizīt činavnīkim. Pōrsasāst iz cyta krāsla, tyuleņ kompensacija, zynoms, nu nabadzeigūs nūdavu naudeņas.
Maseit, meiliņkō, lai šys gadeņš līk vairōk smaideit, navys skumt! Varbyut tu, kai jaunōka i gramatnōka, zini, kur atrast taidu doktoru, kurs cylvākus izōrstētu nu montkōreibas, lai myusu vodūni nabyutu tik olkateigi, daleitūs ar visim ļautenim. Cik tys byutu taisneigi!
Gaigalovas Leontina
Komentāri