Grōmotu “Mōras Zeme II” losūt, es pēški nūsorku aiz kauna un pasaceju, kai vīnmār, kod asmu izdarejis kaut kū napareizu un nalobu: “Nu, Trōpiņ, tu esi čangals!”
Runa ir par munu gabaleņu “Kura nu divom?”. Ir 2001. gods, un maņ ir licīs, ka L. Leikuma un Jurs Cibuļs ir malači (pareizi dora?!), pīsokūt “sovu latgalīšu volūdu”. Nu jau lobu laiku saprūtu, ka patīseibā sōkts ļauns dorbs pret Latgolas pastōvēšonu un vīnōteibu ar Latviju.
Drusku vēstures par munu kļyudu. Vēļ nagōju skūlā, brōļs Jōņs vēļ jaunōks, mōsa Valda tikkū “atskrējuse”, tōpēc mōte uzticēja mani Ondrupines rodim. Atcerūs, ka bejom cīmūs. Tī jaunkuņdzes grīze patafonu, bet es “doncōju”. Jaunkuņdzes smejās, smejās un prosa daudz reižu: “Jyuleit, padoncoj vēļ!” Jyutūs ļūti lapns — redz, kaids es malacs! Un tik lokstu! Meitīši smejās kai troki! Sa
jyusmai punktu pīlyka tante Berta (mōtes mōsa), parōdūt, ka maņ vaļā bikšu prīška, un pa tū karinej sorkonais flaneļa krakls. Kauns!
Ari runōšona gōja kai pa calmim. Sōkumā latgaliski, tod Gotlība skūlā (Vydzemes — Latgolas pīrūbežā) — vaļsts voi baļtīšu volūdā, un beidzūt Malnovas lauksaimnīceibas tehnikumā jyutu, ka latgaliski vairs naprūtu. Mōtes volūdas pōrrōvums ilga leidz pat pagōjušō godusymta 80. godim, kod tyku dorbā Rēzeknē, kod dīnas gaismā izgōja latgaliski roksti — avīzes.
Raksteju, prūtams, ar drausmeigom kļyudom, jo nabeja pamatu — skūlas. Atzeistu, ka ari tagad narokstu perfekti pareizi, bet zynu, ka cyta ceļa nav, kai tikai P. Stroda dorba turpynōšona. “Jaunō” ortografija smird pēc Vitebskas! Kļyudeitīs asūt ciļvēceigi, prūtams, ja ir dzeiva sirdsapziņa, kas līk nūžālōt grākus.
Un tei smyrdūņa jyutama jau vysai dreiž, par kuras ļaunumu grōmotā breidynoj katōļu Bazneicas kolpi, daudzi inteligenti cylvāki — Jōņs Eļksnis, Anna Babre un citi.
Paīt godi, bet gaiss Latgolas volūdas dryvā nav tapis “smaržeigōks”. 2007. (varbyut 2008.) godā “jaunū” ortografiju apstyprynoj kaut kaidi nūteikumi attīceigōs varas īstōdēs Reigā. It kai nabyutu tautas protestu pret tū, it kai nabyutu dažu Saeimas deputatu čangaliskōs (kauns!!!) izagōzšonas, dūdūt svineigū zvārastu. Un tys ļaunais vēzeits vēļ šudiņ rōpoj pa Latgolas volūdas mīsu. Nudi, jōtic sazvēresteibas teorijas asameibai. Laime Dīva, vīns ūtrs preses izdavums (pa jaunam) jau ir aplauzis rogus (bankrotējis), bet smird vēļ radio “Kolnasāta”, ari regionalajā TV. Acimradzūt ļaunuma vadzis vēļ nav tik pylns, lai lyuztu. Bet byus!
Leikumainajim smirdeigō Trojas zyrga volkōtōjim pa veseleigū un teirū latgalīšu volūdas lauku jōsaprūt: leikumi nav bezgaleigi, agri voi vālu, tyvōk voi tōļōk sōcās taisnais gaismas — Dīva ceļš! Kauns laksteit pasaulē ar vaļeju (bikšu) prīšku. Mōras zeme nadreikst smirdēt!
Jūlijs Augusts TRŌPS
P. S. Sovu kļyudu (grāku) asmu izsyudzējis ari pi bikts.
J. T.
Komentāri