Vasala, Plōciņu Maseit! Beidzūt! Kas par beidzūt? Par tū nadaudz piečōk, tys ir, vālōk. Pļapatunu Donets tai ari sōce sarunu pēc sasasveicynōšonōs. Jys īsasauce: “Beidzūt! Es natycu pats sovom ausim!” Es vaicōju: “Tu laikam par tukšajom pudelem?” Jys atbiļdēja: “Pīter, piļneigi pareizi. Nu nōkamō goda 1. februara byus lela daļa cylvāku, kas tūs īpakōjuma traukus nūdūs. 10 centi – tys ir lobs sōkums. Tu pats pīmini, ka padūmju laikūs tai beja.” Es saceju: “Nabeja jau vyss tī malns, kai tū pasnādz. Varēja jau itū lītu pōrjimt bez pōrtraukuma. Tod 10 kapeikas moksōja! Vysmoz kaidā vīnā lītā byutu bejuši Baltijā pyrmī. Bet te – naetiski izavērsīs. Etiski ir dzert yudini ar sasadalejušīm plastmasas pīmaisējumim?” Donets saceja: “Piļneigi pareizi. Dēļ tō tagad laikam yudini pērk veikalūs. Mes naasam tuksneša vaļstī. Te dzeramō yudiņa krōjumu pīteik, bet vīnolga pērk veikalūs. Taitod te ir kaut kaidi pamatōti īmesli, ja gotovi naudu atdūt par yudini. Pi tam na mozu.” Te myusu saruna beidzēs, Plōciņu Maseit! Laikam jau yudiņs tai pīmāslōts, ka deputatim un vaļdeibai nikas cyts naatlīk, kai sekōt un palikt par Baltijas asti šamā jautōjumā.
Pļōpu Pīters
Komentāri