Pēckara godūs Rēzeknē gondreiž nabeja īdzeivōtōju. Laukūs sōcēs pīspīdu kolektivizacija. Jaunōtne beja spīsta pamest tāva mōjas un bēgt uz piļsātu, lai izdzeivōtu. Ari Bronislavs bāga — uz Kōrsovas MTS
(mašinu — traktoru staciju):
tī vysmoz moksōja. Kod Rēzeknē sōce byuvēt miļzeigas fabrikas, devēs uz turīni. Kai sēņs pēc leita auga privatmōju rajoni — Vipingā; nu tō gar tērgu, stōdeitū mežu leidz pat azaram; dīnvydu rajons — ar vacticeibnīku dīvnomu centrā. Olgas beja nīceigas. Kai cēle? Pasateicūt laucinīku solidaritatei. Vīns ūtram vede betonu, grantu, akmiņus, kūka guļbyuves nu laukim, dēļus, ceglus. Var apgolvōt: Rēzekni uzcēle bejušūs laucinīku solidaritate, izpaleidzeiba. Nūpērkt oficiali gondreiž nikō navarēja. Kū dareit? Pats Brežņevs vīnreiz vaļsirdeigi izarunōja par sovu jauneibu: krōvem vagonus, trejs kastes vaļstei, vīnu — sev. Tai beja pījimts. Tauta tū jēme vārā. Nu olgom vīn nikas nabeja uzcalts. Kai Donkihots ar vēja dzērnovom ar tū ceinejōs OBHSS
(Socialistiskō īpašuma laupeišonas apkarōšonas nūdaļa).
Šymā ceiņā uzvarēja varūneigō padūmu tauta. Broņiks uzcēle mōjeli. Sanōce puiši: vajadzeiga oka. Koļa Burovs nu Ismerim, Pīters Janevičs nu Feimanim, Staņs Laizāns nu Tučim, Arkadijs Miroļubovs nu Jušim. Nūsprīde: vajag rakt! Vītu nūrōdeja vacais Zlotnikovs, kai vysod — treju āderu krustojumā. Pavysam blokus Broņika mōjai. Tolka izroka, īlaide betona riņčus. Tovu gordu yudini! Oka beja naizsmeļama. Cylvāku straumes plyuda nu reita leidz vokoram, jēme yudini ēdīņam, veļas mozgōšonai, pērtei. Vosorā — dōrzim. Nōce i brauce pat nu tōlīnes. Yudiņa pītyka visim. Broņiks i racēji nu jau tymā saulē. Uz oku vēļ atnōk daži yudiņa nesēji, pa laikam. Broņika oka turpynoj kolpōt cylvākim.
Ilmārs SILKĀNS
Eduarda UTĀNA foto
Komentāri