Vasala, Plōciņu Maseit!
Šudiņ mes obeji ar Pļapatunu Donetu ziņōs dzērdējom vīnu “jauku” jaunumu. Īprīkš beja vēļ “jaukōks”, bet šys pōrsyta pyrmū.
Pyrmais jaunums beja taids, ka Latvijā labi budžetu plānoj, ka tikai 35 daļis nu vysa budžeta ir porōdi. Na veļti cylvāki runōja, ka porōdus moksōs bārnu bārni. Bet šudiņ rikteigs pōrsteigums. Jaunais budžeta maiss taids draudeigs. Ka varūt tū vairōk pat nasalōpeit, ja napareizi kraušūt tymā naudu. Redz, cik tōļi jau asom!
Donets sacēja: “Nav labi, Pīter. Tai var aizīt leidz vaļsts bankrotam. Kū tod jī dareis?”
Es soku: “Gon jau kū izdūmōs. Demokratiskōs vaļsts nabankrotej, bet līk budžeta maisūs gryutōs porōdu monetas, lai tikai pleist un tod navar aizlōpeit.”
Donets pīkrita: “Pareizi tu soki. Nademokratiskais Lukašenko Boltkrīvijā turīs kai prosdams, i kai byus beigōs, navar zynōt, bet demokratiskōs vaļsts nivīns nalobais naraus. Kōdreiz runōja, ka Amerikai (nazynu, kai tagad), cik lels beja budžets, tikpat lels porōds, un voi tod kas ar Ameriku nūtyka? Nu nikas! Kai pastōvējuse, tai pastōv. Taidu matematiku myusim nasaprast.
Ka atsarostu kaids gudrs cylvāks i myusu politikim īdūtu gudru padūmu, kas jōdora, lai vaļsts nabankrotej. Sovā laikā tai gryuši iz šū demokratiju beja pōrīt. Jo nu tagad otkon vara maiņeisīs… oi, oi! Tūlaik cylvākus cauri nagaisim ticeiba un cereiba iznese, ka byus lobōk. Bet jo nu tagad kas nūtyktu, vairs nabyutu smīkls. Nazynu, kai vēļ myusim pošim tod byutu.”
Taida beja myusim tei saruna. Tikai navajag beitīs. Cylvāki runoj vysu kū. Nikur mes napazudom un napazussim.
Palīc vasaliņka, Plōciņu Maseit! Leidz cytai reizei!
Pļōpu Pīters
Komentāri