Latgolas Kulturas centra (LKC) izdevnīceiba dorbu sōkuse 1990. goda 1. junī. Leidz šam laikam izdūtas dažaida satura ap 500 nūsaukumu grōmotas, nadaudzas brošuras (grōmateņa leidz 48 lopaspusem) un bukleti. Tymā skaitā izdūta kulturvēsturiska un literara godagrōmota “Tāvu zemes kalendars” (25 godagōjumi) un literaturas almanahs “Olūts” (12 laidīni). Vysvairōk grōmotu izdūts latvīšu literarajā volūdā. Izdūtas ari grōmotas krīvu un angļu volūdā. LKC izdevnīceibas dorbs vīnmār ir bejis ļūti saspringts, ar mozim, bīžōk napīteikamim leidzeklim. Taču šūreiz gribu pasateikt cylvākim, kuri īguļdējuši lelu dorbu grōmotu topšonā, kuri pastōveigi voi periodiski sasadorbōjuši grōmotu popularizeišonā, izplateišonā, materiali voi cytaidi atbaļstejuši LKC izdevnīceibas darbeibu. Tī ir Valentīna Unda, Līvija Kalvāne, Solveiga Sarkane, Ilona Žukovska, Stella Elksne, Pīters Keišs, Osvalds Zvejsalnieks, Jōņs Blaževičs, Māra Nizinska, Harijs Fridemanis, Paulīne Zalāne, Anita Graudiņa, Marija Ruhmane, Marija Sprōge, Anastasija Strauta un daudzi cyti. Pateiceiba pīsanōk ari vairōkom katōļu bazneicom par sekmeigu “Tāvu zemes kalendara” izplateišonu. Grōmotā vīnmār golvonais ir tōs saturs un gramatiski pareiza volūda. Tōpēc izdevnīceibā vyssvareigōkō lūma ir literarajam redaktoram. Šūs pīnōkumus izdevnīceibā jau daudzus godus ļūti apzineigi veic Valentīna Unda. Kolektivā, kas roda grōmotu, svareiga lūma ari mōkslinīkam: jys ar mōkslas leidzeklim var pastyprynōt teksta izteiksmeibu. Šamā jūmā izdevnīceiba sasadorbōjuse ar Pīteri Gleizdānu (1934 — 2013), Jōni Svenču un Lūciju Gadzinu. Kotrs nu jim sovā izpiļdejuma manierē — burtu, zeimējuma un fotografijas kombinējumā, ornamentali dekorativā nūformējumā voi poetiskā gleznīciski grafiskā izpiļdejumā ļūti bogōtynōjis grōmotu. Lela pateiceiba pīsanōk “Tāvu zemes kalendara”, “Olūta” un cytu grōmotu autorim. Asam pateiceigi Vaļsts Kulturkapitala fondam, Latgolas regionalōs atteisteibas agenturai un Latgolas pašvaļdeibom (vysvairōk Rēzeknes piļsātas dūmei), kas snāguse finansialu atbolstu grōmotu izdūšonai. Ļūti atzineigi vērtejams SIA “Latgales druka” (direktore Ilona Kazaka) un SIA “Jelgavas tipogrāfija” dorbs. LKC izdevnīceibas dorbs turpynojās īrostā gaitā. Dreizumā izīs “Olūta” kōrtejais laidīņs, bet nadaudz vēļōk — “Tāvu zemes kalendars 2016” un vairōku autoru grōmotas.
Jōņs EĻKSNIS,
LKC izdevnīceibas vadeitōjs
Komentāri