Pyrmom kōrtom kotram rūnās jautōjums: kū nūzeimej vōrds “fati”? Voi tam ir kaida saisteiba ar angļu volūdu, kas tik strauji īīt myusu dzeivē? Izarōdīs, nā. Filmas scenarija autore Ieva Pastare skaidroj, ka pyrmū reizi ar itū vōrdu sasastopusēs Ingas Ābeles romanā “Klūgu mūks”, un vōrda skaidrōjums varātu byut “cylvāki, kas ir jauni, glupi un naivi”. Ja tai, tod jōpīkreit, ka nūsaukums ir atbylstūšs, jo seriala golvonī varūni uzavadās kai glupi cylvāki. Un tī ir divi skūlōtōji, kur vīns rūkdorbu stuņdēs līk audzēknim izgatavōt veirīšu dzymumorganus, lai tūs pēc tam varātu pōrdūt kai “sīvīšu prīku” un nūpeļneit naudu, bet ūtrs, kīmikis, kuram katastrofali vajadzeiga nauda, nūlem kertīs pi cigarešu kontrabandas, paleigūs jemūt… skūlneicu. Taids, lyuk, filmas kriminalais sižets. Seriala idejas autors ir mūzikis Arnis Slobožanins, un jō ideja par cigarešu kontrabandu nav nu pērsta izzeista. Izarōdōs, Arņa dzymtajā Kōrsovā pateišam beja nūticis kontrabandas cigarešu skandals, un uz šō nūtykuma ari bolstōs filmas stōsts. Lai ari seriala darbeiba nūteik pīrūbežā, filmēšona nūtyka Daugavpilī. Seriala “Fati” mecenats ir Pīters Ragaušs, režisors – Vadims Bogdanovs, izpyldproducente – Kristīne Veinšteine. Golvonajōs lūmōs – Ritvars Gailums, Māris Korsiets, Zanda Mankopa, Liena Šmukste, Kristīne Veinšteina, Jurijs Djakonovs. Muzika: apvīneiba “Ausmeņa Records”, “Cegly”, Arnis Slobožanins, Mārcis Lipskis, Jurgis Lipskis, Amanda Lapa, Ūga. Kūpā ir četras serijas, kotra 20 –25 minutes gara. Seriala “Fati” izpyldproducente Kristīne Veinšteina par seriala scenariju un varūnim soka: “Serials ir vīgls, bet ir ari, par kū padūmōt – par myusu cylvākim, par Latgolas cylvākim. Seriala ideja beja Arņa, un tod mes jū apaudzējom. “Fatu” varūni ir nu dzeives: nu ir skūlōtōji pīkusuši un reizem naapmīrynōti ar dzeivi, ir sīvas, kas komandej, un mamas ari ir taidas, kaidas jōs reizem ir – dažaidas.” Prūtams, ari atsauksmes pēc seriala nūsaskatēšonōs ir un byus dažaidas, kotram sovas. Cerams, ka seriala veidōtōji turpynōs īsōktū dorbu, un byus ari cytas latgalīšu filmas un seriali.
Aija MIKELE-STRUŠELE
Komentāri