“Byuteibā jys beja na vīn skūlōtōjs, bet ari skūlānu aizbiļdnis, kurs mudynōja vuiceitīs, apgiut zynōšonas,” par izcylū pedagogu un goreidznīku Nikodemu Rancānu soka Rēzeknes Latgalīšu kulturas bīdreibas pōrstōve Anna Rancāne. “Jys beja bazneickungs, jys beja skūlōtōjs ar lelū burtu, ari skūlu dybynōtōjs. Kod gatavōjamēs Fraņča Trasuna jubilejai, īsadūmōjam, ka jam beja daudz leidzgaitnīku, un vīns nu spylgtōkīm, bet dīmžāl aizmērstim cylvākim ir Nikodems Rancāns.” Nikodems Rancāns bejis vyspuseigs cylvāks, kura darbeiba ir nanūvērtejama, dēļ tō taida, nōkūtnē, īspējams, tradicionala, ikgadeja bolvas pasnēgšona byus kai savdabeigs pīmineklis darbeigajam latgalīšam, stōsta Anna Rancāne. “Gribējōs atzeimēt tūs skūlōtōjus, kuri Latgolā strōdoj, īpaši tymōs nūzarēs, kur dorbōjās Nikodems Rancāns,” nūrōda Anna Rancāne. “Pyrmom kōrtom, latgalīšu volūdas, kulturvēstures un tradiciju mōceišonā, kas it kai nateik atbaļsteita un atstōta kotra skūlōtōja poša iniciativai. Tūmār jūs vajadzātu sabīdreibā vairōk parōdeit un atzeimēt.” Jaundybynōtū apbolvojumu, kai vīnu nu Latvijas symtgadei veļteitīm pasōkumim, kura ītvorūs jau šūrudiņ tiks gūdynōti Latgolas izcylōkī pedagogi, atbaļstejuse Kulturas ministrija un vairōkas Latgolas pašvaļdeibas. Leidz septembram pretendentus bolvai var pīteikt četrōs nominacijōs: par īguļdejumu un sasnāgumim latgalīšu volūdas, kulturvēstures un nūvoda mōceibas īvīsšonā izgleiteibas procesā; par inovacijom izgleiteibas procesā; par myusdīneigu un rodūšu pīeju skūlānu dorba tykuma audzynōšonai un omotu apmōceibai; par veiksmeigōkū jaunō pedagoga debiju. “Pasōkums nūtiks Nikodema Rancāna dzimšonas dīnā, 13. septembrī, jō izlūlōtajā vītā — Rēzeknes Skūlōtōju institutā jeb Rēzeknes Augstskūlā. Mes ceram, ka itei tradicija byus nūtureiga, jo skūlōtōjs myusu sabīdreibā teišam nateik pīteikami atbaļsteits, īvārōts un gūdynōts, seviški Latgolas skūlōtōjs,” soka Anna Rancāne. Rēzeknes Latgalīšu kulturas bīdreiba cer uz Latgolas izcylōkūs pedagogu apbalvōjuma tradicijas īdzeivynōšonu nōkūtnē, 13. septembri turpmōk svynūt kai Latgolas Skūlōtōju dīnu.
Renāte LAZDIŅA
(LSM)
Komentāri