“Viņš bija pirmais lielais latgalietis jau tad, kad ne Latgales, nedz arī Latvijas vēl nebija. Pateicoties viņa pūlēm un cīņai, Latgale izkļuva no Vitebskas guberņas un pievienojās kopējai Latvijas valstij” — losam Rēzeknes Centralōs bibliotekas mōjas lopā. F. Trasuna literarajā darbeibā pyrmū vītu ījem publicistika, rakstejis ari stōstus, dzejūļus un fabulas; vīnmār uzsvēris, ka nikod nav gribējis kļyut par rakstnīku, bet šū dorbu darējis kai pīnōkumu, lai kolpōtu latgalīšu literaturai. Augstā mōkslinīciskā leimenī uzraksteitas ir fabulas, kas 1. majā Sakstagolā īskandynōja Latgolas symtgadei veļteitus naparostus svātkus ar moto “Ka kūpeibā ir spāks..”, rindeņu nu Franča Trasuna fabulas “Zvēri un namdari”.
“Ka kūpeibā ir spāks,
Pret tū i runōt grāks.
Bet dorbā loba nagaidi,
Kod sasabīdrōsi ar naprašu voi nagūdi,
Tik sevi padareisi vōju.
Tū rōdeis jums šei fabula,
kū es pi cytom krōju.” Patīsi vōrdi. Eisi un kūduleigi. F. Trasuna fabulu izrōde Sakstagola “Kolnasātā” deve lelu enerģijas lādeņu. Trasuna fabulas beja padareitas dzeivas, caur fabulom breivā napīspīstā atmosferā īsaistūt sarunōs talanteigus latgalīšus, personeibas: dzeivē ryudeitu veiru, zemnīku, kulturas darbinīku Andri Eriņu un žipereigū Veremu pamatskūlas puiškynu Jōni Pivaku; ļaužu dvēseļu kūpējus skūlōtōju un dzejneicu Ivetu Ratinīku un prīsteri Rinaldu Broku; sportisti olimpīti Guntu Latiševu-Čudari un bejušū uzjēmēju, kulturas darbinīku Juri Vucānu. Sarunas par dzeivi, fabulu caurveitas, ritēja breivi, ar humora dzērksti; tōs virtuozi vadēja izrōdes režisore Iveta Graudiņa. Ari Plōciņu Masei tī beja sovs vōrds sokams par sovu dzedu Izidoru, kurs vīnā ūļneicā ar Trasunu dzeivōjis. Vysus kūpā vīnōja teatra “Joriks” aktīri Laura Atelsone, Kārlis Derums un Kārlis Tols ar dzīsmi, ar muzicēšonu, ar sovu uznōcīni maskōs un, prūtams, ar sovu sirsneibu “Vōlyudzānu” konkursa laureati Raina Arbidāne un Jōņs Piveks. Paļdis visim, kuri šūs naaizmērstamūs svātkus sareikōja! Īpašs paļdis nanūgurdynomajai mōkslineicai Danai Vasiļjevai.
Anita GRAUDIŅA
I. ARBIDĀNES un A. RANCĀNES biļdes
Komentāri