Vasala, Plōciņu Maseit!
Mes sasatykom ar Pļapatunu Donetu, un jys īsōce runōt par tolkom. Gribēju pōrtraukt un saceit, ka vysas tolkas jau seņ progōja, bet tai kai jys vysod īsōc naparostai runōt, tod es gaideju, kas tagad byus.
Donets saceja: “Kaida loba dūma. Leidz nōkušō goda 18. novembram ar tolkom uzpryšynōt Latviju. Naz, kai tys nūtiks. Vaļsts prezidents īsaceja saimei alkagolu pōrdūt tikai stykla buteļōs. Tikai vīneigīs vaicōjums. Kas byus pēc tam?”
Es saceju: “Nui, kas to byus?”
Donets atbiļdēja: “Tu zini, ka daudzi pamat pēc sevis traukus. Plastmasas buteles pat nu yudiņa izceļsi, bet kai byus ar stykla taru?
Myužeigs skaistums. Koč vīnā vērzīnī atsagrīzsīs sovetu laiki. Styklu čupeņas uz stidzeņom, kryumeņūs, mežeņūs. Ar bosom kōjom — nikur! Tod varēs sōkt prezidenta kungs piļdeit sovas partejas teišūs pīnōkumus. Byus jam myužeigō tolka. Nu agra pavasara leidz vālam rudiņam. Tū vēļ vajadzātu specialā televizejas kanalā tīšraideit, lai var ļauteni redzēt, voi visi stikleni leidz pādejam salaseiti.”
Te gon es Donetam ībyldu: “Donet, voi ta tu nazini, ka tukšōs stykla buteles veikalūs jem atpakaļ. Dēļ tō bomzeiši Rāznē nu reitim vysas miskastes apstaigoj i ar pylnom kulem iz mārketu… Koč kaidu naudeņu daboj..”
“Tod jau prezidents pareizi dūmoj. Vajadzātu bomzeišim buteļōšonas reidus pīdōvōt, jūs palaikam (koč pyrms vēlēšonom) pi dobas izvest un palaist pa mežim, kryumim, pikniku vītom buteļōt… Visim byutu sovs lobums — i bomžim, i deputatu kandidatim, i Latvijai.”
Kū te vēļ lai soka?
Ka tik Latvija zaļa…
Pļōpu Pīters
2017. goda 2. junī
Komentāri