Vasaļiņka, Plōciņu Maseit! Itū reizi Pļapatunu Donetam izgōja tai, ka acis īsaplēte un mute pasavēre. Bet nu vysu pēc kōrtas.
Maņ pošam kaida sīvīte pavaicōja: “Kai cylvākam tikt iz sātu, jo dorbs beidzās vokora pīcūs un pādejais autobuss nu piļsātas izbrauc ari tymā pošā laikā, pīcūs?” Nabeja kū saceit. Es itū pavaicōju Donetam.
Strāču padūmōjis, Donets saceja: “Nazynu, kū jaunais satiksmes ministrs dūmoj par itū, kū satiksmes direkcija, bet vyss ir izdareits, dūmojūt par cylvāku drūšeibu.
Jyusim dorbs beidzās pīcūs voi vokorā ostoņūs? Nu tod zinit, ka vaļsts ryupejās par jyusu drūšeibu. Vokorā un seviški naktī cylvāks ir mīgains un vīnā šaļtī var gadeitīs kaida kibele. Tymsā var kaids škeistzarņs “apteirēt” voi ūļneicā bez gaismas cylvāks var pakrist, kauleņus salauzt. Bez tam nakts autobusā, pēc dorba, var aizmigt un aizbraukt garam sovai pīturai.
Breivdīnōs dēļ tō ari atcalti reita reisi. Pēc garōs dorba nedeļas cylvākim pateik ilgōk pagulēt, bet kas tod nūtiks, jo taidi ļauteni autobusā aizmigs un na tikai sovu pīturu probrauks, bet vēļ īsadūmōs, ka sepinej sovā gultā un golapunktā ar šoferi sōks “spertīs”, par kū jūs dzan nu gultas ōrā.”
Tai ka lobōk naprosit papyldu reisus. Vaļsts par jyusim cīši ryupejās. Gudreibas beņči zyna, cik soldonai dzeivōt bez dorba: kai pamat meikstūs krāslus, tai sajem kompensacijas i dzeivoj, capures kuldami. Viņ žāļ, ka par tīm mozīm un “malnīm” bezdarbnīcenim, kuri komojās, jim moza bāda.
Pļōpu Pīters
Komentāri