Vasala, Plōciņu Maseit!
A kū ta tu padareisi, kod nūteik nalobō dorbi, tod ari par tīm jōroksta. Te nu beja Pļapatunu Donetam kū saceit: “Tikai tī, kuri Latvijā krīviski runoj, nav vaineigi pi itō kara. Kū jī var izdareit? Tikai protesteit un paleidzēt, kam slikti klōjās. Jī nav vaineigi pi Krīvijas vaļsts vadeitōju smedziņu kapturim, ka tī aizkvāpuši, nalabi dorbojās, na tamā vērzīnī. Tōs lelōs vaļsts vadeitōjim tai kai pošim byutu jōsaprūt, ka vajag sevi drusku pavādynōt, lai tai napareizi nadūmōtu.
Karš itys nav nikaids nīks, koč, atklōti sokūt, nivīnam navajadzeiga nūdarbe. Tikai pūstu nas. Na tikai Ukrainai, bet ari Krīvijai. Tai varai vyspyrms beja jōpadūmoj par sovu tautu. Kai jī dzeivōs tōļōk? Tod tikai beja jōizdūmoj, voi vyspōr tū vajadzēja sōkt? Itī nalobō dorbi! Vysmoz tagad vajadzātu pōrtraukt vysu, kas īsōkts. Lobōk vālōk nakai tod, kod sabruks Krīvijas ekonomika nu sankcijom. Ar kuru golu jī dūmoj, tō kara vedēji? Ar golvu ci sēžamvītu? Dēļ kō Eiropā taids lels bardaks vajadzeigs? Nā, izdūmō, ka vajag. Tai kai pasaulē napītyktu smuta dorbu? Še jyusim taida dōvona pavasara laikā. Napadūmoj, tamā 9. majā vyss pēški var sasagrīst ūtraižōk. Bet kū tod īsōks? Turpmōk byus kara zaudēšonas svātki?”
Kū te vēļ lai pībylst. Paļīc vasaliņka, Plōciņu Maseit, leidz cytai reizei.
Pļōpu Pīters
2022. goda 31. martā
Komentāri