Vasala, Plōciņu Maseit! Jau dūmova Pļōpu Pīters, ka nasaīs itymā mēnesī Tev nikō pīraksteit, a te, še tev, vyss vīnā dīnā nūsakōrtova. Paļdis Dīvam, pasatrōpēja ceļā Pļapatunu Donets. Myusu mīsta lelōkajam runas veiram kai vysod beja kū saceit.
Itū reizi jys sōce tai: “Pīter! Pīroksti sōkumā paļdis Plōciņu Masei par tū lobū komentu. Myusim ari kas tyka nu jōs dūmu gryudim.
A niule par referendumu. Anglija taisneigi, ar referendumu, stōjās ōrā nu Eiropas Savīneibas.
Šveice atsarūn vydyn Eiropas Savīneibai, i nav tamā īsastōjuse. Nu tī, pi jūs, ir cīši taisneigai. Referendums pēc refererenduma.
Na tai, kai pi myusu. Savēlejom gudreibas beņčus iz četrim godim, i tod jī dora, kū grib.
Pasok, kur ir vīna taisneiba — vīns lykums visim?”
“Laikam jau tikai saimes sēžu zalā,” es saceju.
Donets atbiļdeja: “Piļneigi pareizi. Tai pat, kai jī nūsoka poši sev olgas, visim ļaudim pošim jōnūsoka, cik jī sajims. Cītumnīkim pošim jōnūsoka, cik jī ilgi tupēs. Taida byutu vīna taisneiba — kotrs pats sev.”
“Donet, tai vaļsts mudri var aizīt dybynā,” es jam soku.
“A cik ta dzili jei niule?
Pīter, par vaļsts pōrvaļdeitōju olgom un citim lobumim, kū jī sev pīškir, jōreikoj tautas nūbolsōšona!” groznai saceja Donets un apklusa.
Tai myusu saruna beidzēs.
Maseit, ka tai labi padūmoj, itū putru, kū gudreibas beņči myusu vaļstī pīvōrējuši, strābdams naizstrēbsi.
Pļōpu Pīters
Komentāri