Jau ir izgōjis literaturas almanaha “Olūts” 21. laidīņs. Izdavumā publicāts 31 autora dorbs. Grōmotas apjūms ir 336 lopaspuses. Šymā laidīnī ir vairōk prozas teksta. Ir apcere par gleznōtōju Anatoliju Zeļču. Publicātas ari dažas jō gleznu reprodukcijas. Pošlaik nūteik sagatavōšonas dorbs ar 2017. goda kulturvēsturiskas un literaras godagrōmotas “Tāvu zemes kalendars” materialim. Godagrōmota byus veļteita Latgolas latvīšu kongresa, kas nūtyka Rēzeknē 2017. godā, jubilejai. Dreizumā izīs Donata Latkovska (1912 — 1943?) grōmota “Nacionālā atmoda Latgalē”. Grōmotā īvītōti biografiski aproksti par 91 atmūdas laika darbinīku. Daudzim pīvīnōtas ari fotografijas. Runojūt par rakstnīku, publicistu un kulturvēsturnīku Donatu Latkovski, profesors Pīters Zeile atzeist, ka jō nūzeimeigōkais davums asūt biografiskas apceres par Latgolas atmūdas darbinīkim. Tagad jō grōmota par Latgolas mūdynōtōjim un šō dorba veicējim jaunā izdavumā byus pīejama plašam laseitōju lūkam. Īspējams, ka dreizumā varātu izīt nalels rokstu krōjums par Latgolas latvīšu 1917. goda kongresu. Te publicātī roksti ļaus lobōk izprast šō kongresa ļūti svareigū nūzeimi. LKC izdevnīceiba jau izsnāguse vysom Latgolas pašvaļdeibu bibliotekom Ontona Rupaiņa grōmotu “Māra mostas” un literaturas almanaha “Olūts” 21. laidīni pa vīnam eksemplaram bez moksas. Ari tagad turpynojam papyldynōt Latgolas skūlu bibliotekas.
Jōņs EĻKSNIS,
LKC izdevnīceibas vadeitōjs
Komentāri