Vasaliņka, meilō Maseit! Grybu pasalīleit. Cik myusu socialō darbineica Angelineite ir taisneiga. Eists gūda meitīts! Jei gryb, lai visim byutu loba laiceigō dzeiveite.
Kai jau kotru godu, ari šūgod atnese maņ dōvonu un saceja, ja es naasu pretim, to pi manis atbraukšūt nu teļevizera un nazkaidi činavnīki, un es varēšūt sevi redzēt televizerī.
Oi, meilō Maseit, es tai sazapūžēju kai ar soltu yudini aplīta, pasaceju, ka niparkū lai nabrauc. Padūmoj poša, kū es, sprosts dzeravnes cylvāks, taidim augstō ranga činavnīkim varu pasaceit. Vēļ sapļōpōtu kū ta līku i tjurkī tyktu. Edj, maņ gribīs, lai byutu taisneiba, kab visi ciļvēceni ir laimeigi, na tai kai niule. Kod kungi, kas sēž augstūs krāslūs, lučej tyukstūšas mēnesī, bet prostī dorba rūkeiši komojās, par sovu darbeņu labi ka simteņu sajem. Vaļdinīki nūdevas tik ceļ, vyss toļkin dōrgōks palīk. Zūbi vadzī jōkar. Par tū symtu mēnesī veļc dzeiveibeņu…
Padūmejas laikūs navajadzēja pi sveču gaismas vokorūs tupēt. Kerosins beja lāts. Kolkozā burkōnus myglōja, lai nav jōrevej; mežā žogorus ar kerosinu laisteja i dadzynōja, vyss izgrīztais gobols beja kai ar slūtu nūslauceits. Nakai tān, kod čorteņš beistās sovu spolvainū djapi izcērtumā spert.
Taidā mežā ni ūgu, ni sēņu napīlaseisi, viņ pādejūs kadakus nūplēssi. Kū ta tu bļausi iz žogorim? Vairs ni lātō kerosina, ni bezina. Pi krīveišu to asūt lēšōk. I zōleites, i papiroseņas, i braņdineits. Iz cigarku pačkom to drukavoj, ka peipēšona veseleibai vredna. A braņdineits to veseleigs: kod grips tyvojās, īrauņ tik kļuku, i prīceigs prōts, i kvoroba garom.
Es to, meilō Maseit, ka jau sasakreņkeju, tiuļen giunūs pi smīkleigōs grōmotas ar Vauseiša biļdeitem i Tovim drukavōjumim. Tod prīceigs prōts, otkon smedzeni vītā, sovā kapturī. Navajag ni pi doktorim īt, ni dōrgōs zōles pērkt.
Vēļ, Maseit, grybu pasalīleit. Pi maņa beja īsaroduse Marikeņa ar skūlas bērnenim, padzīdōja, paspēlēja, padoncōja, dōvaneņu nu Sorkonō Krysta atvede. Lela prīca beja.
Palīc vasala, Maseit! Nu sirds dzjākavoju par tū Tovu grōmateņu, kas mani pi veseleibas tur.
Tova Ļoneite K.
Komentāri