Vasala, Plōciņu Maseit! Tu roksti, ka mes ar Donetu tikai par politiku. Nikō nabeja. Mes runojam taipat par vysu kū cytu.
Pīmāram, par plyudim. Donets tiuleņ atroda kū saceit: “Pīter, es taidu gadīni dzērdēju. Kaidam zemnīkam lela zeme. Upes molā. Ar divejim kolnim. Iz vīna, mōlainō, sātas vīta, bet uz ūtra loba augsne. Tys tōli nu sātas. Saimisteibas ūtrā golā. Jū jau īprīkšejī mozī plyudi izvuiceja. Sōce iz kaļņeņa batviņus, kōpustus, burkōnus audzēt par tū, ka pyrms tam tī, leidzonumā, batjani aba stārki maudōjōs un mozgōjōs. Labi, ka uz ražas nūvōkšonas laiku zeme izkolta.
A kai šūgod ar sīnu sagōja? Ni lūpim beja kō ēst, ni pakaišam palyka. Pa upi kaudzeites uz Krīviju aizmōve. Zemnīks tikai pasasmējīs, ka prezidents tī sadūmōšūt lūpeņus turēt, gon jam rūbežsardze paziņōs par pōrkōpējim.
Es jam vaicōju, kai tu vari tai smītīs, kur tev pošam lūpi bez sīna. Jys maņ soka, ka asūt reiceibas cylvāks un jau ūtrā dīnā aizsyutejis lūpus iz kautuvi. Ticis pie naudas.
Tagad jam byušūt jauns bizņess. Lauku turisms. Ekskursantim stōsteišūt par dzymtas un apleicīnes vēsturi. Plyudu laikā vodōšūt ar laivu pa tom vītom, par kurom stōsteis, bet sausā laikā ar autobusu ci mašini.”
“Nu Pīter, kū tu par tū soki?” vaicoj.
Es jam soku: “Kas mōk, tam nōk. Bet kai byus zīmā?”
Jys īsasauce: “Aizmērsu tev pasaceit. Byus snīga brysšonas pōrgōjīņs. Kurs navarēs gryuteibas izturēt, varēs pi datora tīšraidi vērtīs par itū pōrgōjīni voi cytu ekskurseju par brisšonu, laivōšonu voi plūstōšonu.”
Nu tak gudreibas beņčs. Vēļ jam vajadzātu grīztovkas iztaiseit tamōs palīnēs. Īdzeņ mītu plyudūs, kod sasaļs, dasīņ rasnu kōrti pi tō mīta i grīz turistus ar vējeņu gar ausim. Kruši tak, Maseit?
Palīc vasaļiņka, leidz cytai reizei.
Pļōpu Pīters
2017. goda 25. septembrī
Komentāri