Vasala, Plōciņu Maseit!
Jau tik seņ naraksteju, ka Pļapatunu Donets palyka sirdeigs.
Jys saceja: “Es te ceņteigi pļapatoju, bet tu munu runōšonu laid gar ausim. Tu, Pīter, roksti “Vēstim”, ka partejā es naīšu, ka tī nivīns najims vārā, kū saceišu.
Vēļ uzrokst: ir cīši labi, ka Plōciņu Maseite sōce iz Kaliporneju raksteit. Taipat kai agrōk. Nikaids kapturs jai nav aizkvēps.”
Es saceju: “Labi, Donet. Naklapatej. Mudri byus. Jau šūvokor pat raksteišu. Niule soki, kū tu dūmoj par tū autoūstas remontu?”
Jys atbiļdēja: “Rudinī sōce. Tai saprotu, ka vysy zīmu strōdōs. Tod sōka timst agri, cylvāki tī blūdēja nu plača iz placi kai āmūņam. Dēļ tō, ka na visi vīna virzīņa reisi vīna laukuma sarokstā atrūnami. Cikom aizaščupinej pa tymsu leidz kotram plačam, vajadzeigais autobuss jau asti viņ parōda.
Jo vosorā naizgaismōs vysas tymsōkōs vītas, tod nōkušajā zīmā myusus otkon gaida pōrsteigumi.”
Pļōpu Pīters
KAS NŪTEIK VAĻSTĪ?
Doneta runōšona ir daudz garōka, nakai es spēju raksteit. Bet jōroksta ir, to vēļ dabōšu pa ausi.
Itū reizi Pļapatunu Donetam beja svareigōka runōšona — par augstōku ešalonu. “Par saimes “Jenotibas” partejas Solveitu maņ ir kū saceit. Kaidu glupeibu izdareja, ka pēc vēlēšonom nagribēja vadeit vaļdeibu. Lelu kļyudu pīlaide, kod tū gōze. I, golvonais, nivīns nu deputatim nagribēja, lai jō prīškā nu kauna atsataisa zeme, ka vēļ godumejas runu saceis gōztō Straujuma. Jei ari glupai izdareja. Naparedzēja, ka vaļdeibas veidōšona nūtiks vysa goda garumā.”
Tod Donets lyka maņ nūbreidynōt bolsōtōjus: “Vēlētōji! Itei parteja na jyusim dūtūs sūlejumus pylda, bet gon Solveitei. Tai ka tei ir jōs parteja. Jo pēc kongresa jei tī paliks, tod nivīns pat napaspēs sagaideit nōkušōs vēlēšonas, kai pa skuju taku byus aizgōjuse “Jenotiba”.”
Sovu garū sokamū jys nūbeidze ar veseleibu.
“Par nabreives laikim beja taida tautas dzīsme: “Ryndā dzymu, ryndā augu, ryndā myužu nūdzeivōju. Ryndā nōvi īraudzeju, Paradizes dōrzeņā.”
Kai šytys paņteņš tagad atbylst par ryndom pi ōrstim! Tai ari nūteik tymōs ryndōs. Voi na tai? A veseleibas ministrs teļevizerī runoj vēļ te par nazkaidom preses peilem. Jam byutu jōrunoj par sliminīku peilem, kū līk zam gultas. Vysmoz par temu byutu,” ar tū Donets beidze.
Kū te lai soka vēļ. Voi tod myusu vaļstī tai nanūteik? Kas pīrōdeis preteimū?
Pļōpu Pīters
2016. goda 16. martā
Komentāri