Mōras zeme

“ĶĪVĪTES BALSS”

Publicēts: 14. marts 2025 Autors: Rēzeknes Vēstis Komentāri (0)

Pagōjušajā godā Latgolas Kulturas centra izdevnīceibā, pasateicūt Ievas Zuicenas ryupem, izdūta Venerandas Zepas dorbu izlase “Ķīvītes balss”.

Veneranda Zepa (1926–2002), kura ir rakstejuse dzejūļus, stōstus, tālōjumus, bārnu ludzeņas un dramatizējumus, beja Ievas Zuicenas mama.

Venerandas Zepas dzeives laikā beja iznōcis tikai vīns nalels dzejūļu krōjums “Gaismas ceļš” (1998). Bērneibas un jauneibas atmiņu tālōjumu grōmota “Paradīzes ābelīte” izdūta 2007. godā, kod autore beja davusēs myužeibā.

Ieva Zuicena, kōrtojūt sovas mamas arhivu, atroda dzejūļu burtneicu ar vērsrokstu “Ķīvītes balss”. Tur beja daudz lobu, leidz šam napublicātu dzejas dorbu. Tai Ievai Zuicenai rodōs dūma apkūpōt vysus jōs mamas lobōkūs literarūs dorbus vīnā izlasē, kai ari pīvīnōt 1957. godā raksteitū dīnasgrōmotu par Vaļsts kora pyrmū, ļūti garū koncertbraucīnu pa Ukrainas, Krīvijas un Kaukaza piļsātom un jōs nu komandejumim raksteitōs vēstules.

Venerandas Zepas myužs beja saisteits ar dzīsmu un dzīdōšonu. 27 godus jei nūstrōdōja Vaļsts akademiskajā korī (tagad koris “Latvija”), pēc tam dzīdōja korī “Sagša” un ansamblī “Tautasdziesma”.

Ieva Zuicena teic: “Lai šei Venerandas Zepas dorbu izlase ir jōs sveicīņs mums visim un līceiba par jōs un cytu cylvāku dzeivi pagōjušajā, 20. godusymtā.”