Vasala, Plōciņu Maseit! Te nu byus rikteiga tema. Es klausūs un breinejūs par Latvijas Radio. Ir pōri puļkstiņ 11.00, napylna stuņde leidz pušdīnem, bet soka: “Lobreit!” Tod atgōdōju, ka Pļapatunu Donets ir par itū stōstējis. Kod mes sasatykom, tod jam vaicōju: “Kaida saprasšona ir tam, kas radio pyrms pušdīnem vēļ soka: “Lobreit.” Donets atbiļdēja: “Pīter, kū tu padareisi, ka pasaule vysu dora, lai sovu reiceibu attaisnōtu. Lai gulātōji varātu saceit pyrms pušdīnem, ka jī nu reita cālušīs. Kaut kas jūs lobā jōdora. Pareizi byutu, ka dīna nu 9.00 leidz 15.00 byutu, jo puse dīnas voi pušdīnes ir 12.00. Tam pošam jōbyut ar nakti, bet vyss ir pavysam sovaižōk. Maņ viņreiz vīns gudrs cylvāks saceja, ka vysa taisneiba tagad asūt taida. Nakts ir nu 00.00 leidz 6.00. Tai ari radio programā tei nūsaukta par nakts programu. Taitod, ja paspēji aizīt gulēt leidz pusnakšom, tu tū paspēji vēļ izdareit vokorā, taitod laiceigi atneiki pi televizora un laiceigi aizgōji gulēt, na tai kai tī sovaidnīki, kuri ar bārnim īt gulēt pyrms 21.00. Reits sōcās 6.00, agrōk nikai navar. Tei vēļ ir nakts, kaut ari vosorā saule izlākuse. Padūmu laikūs pēc tagadejō vītejō zīmas laika pavasarī un rudinī nōcēs iz skūlu ceļtīs navys 7.00, bet 5.00, jo beja Moskovas laiks. Tagadejam cylvākam līkās, ka tys ir cīši šausmeigi agri. Na tai kai tīm, kas dzeivōja pyrms symts godiem, kurim, cikom nabeja auss reits, vajadzēja paēst, lai ar gaismu ītu teirumā dareit vāla rudiņs voi agra pavasara dorbus. Bet zīmā gatavōjās vosorai. Tagad vaicoj: kū tik agri var īsōkt? Tū – kū tu gribi padareit, bet tev tam napīteik laika. Turklōt gudri cylvāki tagad pat grōmotōs roksta, ka ilgi nūdzeivoj tī, kas agri īt gulēt un agri ceļās, bet ar nūsacejumu, ka saudzej veseleibu. Taitod, visi ilgas gulēšonas atbaļsteitōji, lecit leidz grīstim: ja jyus celitēs 11.58, tys ir vēļ reits. Nu bet dīna ir nu 12.00 leidz 18.00, lai ari tamā laikā zīmā speid zvaigznes un mēness. Tod, kai nūprūti pats, vokors sōcās 18.00. Cylvāki grūza laiku pa sovam, na tai kai tam byutu jōbyut. Raidejums “Pēcpušdīne” radio skaņ jau pēc saules rīta. Kaida tī vēl “Pēcpušdīne”?! Vysmoz padūmu laikā pēc skūlas pušdīnēm 12.00 beja jau pēcpušdīne. Nazynu, kū tagad bārnim skūlā vuica: itū leidz duraka leimeņam sagrūzeitū dīnaskōrteibu vai tū, kai tam byutu jōbyut pēc vysas taisneibas.” Taida gara runa šūreiz Donetam sanōce pēc pōrīšonas iz vosoras laiku. Jau cik godu Eiropas Savīneiba marinej itū stuņdinīku grūzeišonu un navar nikai tikt skaidreibā. Kaidas sankcijas pīmārōt – tī jī mudri, bet par sovu īdzeivōtōju labsajūtu lai ryupejās poši īdzeivōtōji, kai prūt. Palīc vasaliņka, Maseit, leidz cytai reizei!
Pļōpu Pīters
Komentāri