Vīnmār ir bejuši un ir taidi cylvāki, kuri nasēž molā un nagaida, bet īt un dora poši. Taids patriotisks Latgolas cylvāks ir pensionētō pedagoge, piļcenīte (ari Maltas īdzeivōtōja) cīnejamō Anna Babre, kuras vōrds daudzim pazeistams. Teiši jei ir idejas autore tam, ka pīnōcis laiks izdūt atkōrtōti grōmotu “Piemineklis un laiks”. Grōmotas sastōdeitōja un komentaru autore ir mōkslas zinōtneica Irēna Vilčuka. Grōmota izdūta 1992. godā, kod pīmineklis “Vienoti Latvijai”, tautā saukts par “Latgolas Māru”, uzbyuvēts par tautas savōktajim zīdōjumim, nu jauna atsagrīzīs sovā vītā jau trešū reizi. Pošlaik itei grōmota kļyvuse par ratumu, un tōs atkōrtōta izdūšona ir vairōk kai napīcīšama, saceja Anna Babre. Jaunajai paaudzei ir jōzyna myusu vēsture. Kūpš grōmotas izdūšonas pagōjuši 25 godi, tōpēc grōmotu varātu papyldynōt ar jaunim materialim, uzsvēre Anna Babre. Kotrs jauns dorbs, kū īsōkom, labi veicās, kod lyudzam Dīvam svēteibu, lyudzam Jō paleidzeibu. Tōdēļ 30. aprelī Sōpu Dīvmōtes bazneicā Rēzeknē nūtyka dīvkolpōjums, tys reizē kļyva par sōkumu zīdōjumu vōkšonai, lai Latgolas Kulturas centra izdevnīceibā varātu atkōrtōti izdūt grōmotu “Piemineklis un laiks”. Dīvkolpōjuma laikā t. Pōvuls Zeiļa MIC klōtasūšīm uzsvēre, cik nūzeimeiga un vērteiga ir itei grōmateņa. Dīmžāl 1992. gods beja taids laiks, kod navarēja dabōt kvalitativu papeiru grōmotas drukōšonai, ari fotografijas lopaspusēs ir taidas kai ir. Dekantāvs atsauce atmiņā ari pīminekļa liktini, kas ir cīši sasavejīs ar tautas vēsturi. Pēc dīvkolpōjuma visi devēs pi pīminekļa “Vienoti Latvijai” nūlikt zīdus, bet pēc tam Rēzeknes kulturas nomā muziķa Andra Baltača izpiļdeitōs dzīsmes mejōs ar jō atmiņom par laiku, kod topa pīmineklis un itei grōmota. Vēl jōpībylst, ka pyrmajā zīdōjumu vōkšonas dīnā tyka savōkti 70 eiro. Visi lobas grybas cylvāki, kuri grib atbaļsteit grōmotas “Piemineklis un laiks” atkōrtōtu izdūšonu, kurim nav vīnaldzeiga myusu vēsture, sovus zīdōjumus ar nūrōdi “Grāmatas “Piemineklis un laiks” izdošanai” var pōrskaiteit uz Latgolas Kulturas centra izdevnīceibas kontu. Prūtams, zīdōjumus grōmotas izdūšonai var atnest ari uz izdevnīceibu.
Aija ZUJA
AUTORES foto
Izdevnīceibas rekviziti: Latgales Kultūras centra izdevniecība
Reģ. num. 40008007882, Baznīcas ielā 28, Rēzeknē, LV-4601
Konta Nr. LV30UNLA0014000700032, SEB banka, Kods Nr. UNLALV2X
e-pasts: [email protected] Mājas lapa: www.lkcizdevnieciba.lv
Tel.: 371-646-22298, 371-26529898 (mob. “Bite”).
Komentāri