Latgolas Kulturas centra izdevnīceibā izgōjis Ontona Rupaiņa vēsturiskais romans, trilogija “Māra mostas”. Grōmota uzraksteita, pamatojūtīs uz ļūti daudzu vēsturisku olūtu dziļu izpēti. Trilogija sastōv nu trejim romanim: “Poļu dumpis”, “Gaiļi pusnaktī” un “Pēteris Miglinieks”. Romana darbeiba sōcās ar cara 1861. goda reformu par dzymtbyutnīceibas atceļšonu Krīvijā (ari Inflantijā) un pūļu saceļšonōs nūrisem myusu zemē. Grōmotā tālōta latvīšu tautas gryutō dzeive, nacionalōs atmūdas sōkums 19. gs. vydā un ūtrajā pusē. Daudz stōsteits par Inflantijas muižnīku dzeivi un aktivitatem pūļu saceļšonōs laikā, ari vēļōk. Ļūti daudz uzmaneibas romanā veļteits Zaļmuižas īpašnīka, nataisneigō un despotiskō muižnīka Modesta Rozenšilda-Paulina dzeives un darbeibas attālōšonai. Grōmotas golvonais varūņs ir Pīters Miglinīks, kurs uzadrūšinoj uzsōkt taisneigu un ļūti smogu ceiņu pret muižnīkim, īpaši pret Rozenšildu-Paulinu, aizstōvūt sovas tautas, zemnīku tīseibas. Jys ir atsateicis nu sovas personeigōs dzeives. P. Miglinīka kolpōšona sovai tautai, taisneibas un mīlesteibas izjyuta pret vysim paceļ jū augstōkōs ciļvēceibas pakōpē. Tū atzeimējuse ari dzejneica Paulīne Zalāne-Vallena, kas ir Ontona Rupaiņa skūlneica un ļūti loba jō daiļrades pazinēja. Romanu “Māra mostas” vajadzātu izlaseit ikvīnam kulturalam Latvijas īdzeivōtōjam, jo tei ir izcyla grōmota par myusu tautas na vysai senas vēstures svareigu pūsmu.
Jōņs EĻKSNIS,
LKC izdevnīceibas vadeitōjs
Komentāri