Myužeigs skaistums! 20 godus katru mēnesi kūpā ar “Rēzeknes Vēstim” jyusu mōjōs, mīļōtī, ir īnōkuse “Mōras Zeme”. Ar kulturvēsturiskim vēstējumim, ar jyusu rokstim, ar jyusu stōstim, ar jyusu vēstulem, ar jyusu dzejūlim dzymtajā latgalīšu volūdā, kas godim ilgi līgta un nycynōta, apsmīta un pazamōta, vysbeidzūt reabilitēta un atzeita. Paļdis Dīvam! Lai skaņ mōtes volūda, teira, saprūtama, lobōk latgaliski latviska nakai ar svešvōrdim pīsōrņōta. Svātku reizē nasaukšu, ar kaidim. Īsaklausit, kai runoj latgalīši iz īlas, autobusā, tērgā… Ari pošim sevī der īsaklauseit… Dzērdātū pīrokstit un syutit “Mōras Zemei”. Kūpsim sovu volūdeņu! Paļdis visim, dōrgiņkī, ka paleidzējot “Mōras Zemei”, kas nu 1989. leidz 1994. godam iznōce kai naatkareigs laikroksts, bet nu 1997. goda turpynōja sovu gōjumu kai “Rēzeknes Vēstu” pīlykums. Vēļreiz lels paļdis visim laseitōjim, raksteitōjim, dūmubīdrim. Lai jyusim visim loba veseleiba, īdvesme un ceiņas gors!
Ar cīnu —
Anita GRAUDIŅA
P. S. Prīceiga ziņa ir tei, ka vīns dedzeigs myusu draugs nūsprīds, ka Latgolas kongresa 100-gadei par gūdu myusu “Mōras Zeme” ir jōizdūd grōmotā. Latgolas Kulturas centra izdevnīceibā apkūpojūt un saskaitūt 20 godu “ražu”, nūsprīdem, ka vīna grōmota byus pōrōk lela, gryuta un naparūceiga un “RV” “Mōras Zeme” jōizdūd pa daļom. Bet pyrmajam sējumam jōbyut leidz kongresa 100-gades svineibom majā, — soka myusu labdars. “Nu Tovas mutes Dīvam ausī,” saceitu Plōciņu Mase.
A. G.
Komentāri