2. majā pyrmajā TV programā redzēju raidejumu “Laiki, cylvāki, volūda” (vadeitōjs A. Slobožaņins). I tī vīns nu runōtōjim škita aizvainōts, ka latgalīšu volūdu saucūt par žargonu. Nav tīsa! Volūda nav žargons. Bet žargons ir tys, ka latgalīšu volūdā runoj un roksta cylvāki, kuri naatškir volūdu nu žargona. Un tymā skaitā ari cylvāki, kuri ir runasveiri radio un televizijā.
Izrokstu nu svešvōrdu vōrdneicas: “Žargons (filol.) – sociolekts ar nūteiktu (socialōs grupas voi profesijas) specifisku leksiku.”
Cik daudz Latgolā ir taidu socialūs grupu (apvydu), kur kotrā runoj sovaidōk, tik ari ir te žargonu. Navar byut taida dažaida vīna latgalīšu volūda: ja runojam latgaliski, tod ari tai runōsim, bet na lītōsim cytas volūdas vōrdus.
Navar byut, ka mes tik leidzeigi runojam ar Kūrzemes, Vydzemes, Zemgales, tagad ari Sēlijas ļaudim un sevi saucam par īpašas volūdas cylvākim. Nikaidi izradzātī mes naasam, tikai sovā volūdā jōizavairoj runōt svešu, vēsturiskā ceļā pīlypušu volūdu vōrdim. Un tīši te ir pamateigi jōstrōdoj myusu latgalīšu volūdnīkim. Nivīns jau cyts naizteireis myusu volūdu, ja mes poši aizstōvim un runojam žargonā. Jā, jā – žargonā!
Vēļ teik runōts par taidas žargonismu pībōrsteitas latgalīšu volūdas mōceišonu skūlōs!
Un vysim vuiceitim ļaudim byutu jōsaprūt, ka Latgola ir na tikai ap vaļsts austrumu rūbežu, bet ari leidz Aivīkstei. Tod ari cīneisim tūs cylvāku volūdu! Jo myusu volūda ir cālusēs nu vīnim un tim pošim vēsturiskajim senčim. Tik teišam skolōsim, teireisim sovu latgaliskū volūdu, bet izavaireisim tai lypynōt klōt svešu volūdu vōrdus un seikūs līkvōrdeņus.
G. MELNE
Komentāri