Beidzūt tyvojās nūslāgumam catūrtdaļgodsymtu ilgō polemika par Vladislava Lōča personeibas īmyužynōšonu akminī. Pīmineklis tiks nūvītōts Izgleiteibas ministrijai pīdarūšajā Rēzeknes Tehnologiju akademijas teritorijā Atbreivōšonas alejā 90.
Na tikai ar Daugavpili, bet ari ar Rēzekni saisteita Vladislava Lōča darbeiba. Izdevējs izmontōja tipografijas “Dorbs i zineiba”, kas beja Surmoninu nomā, i marijaņu tipografijas pakolpōjumus īlas pretejā pusē.
15. maja īlā 29 (tagadejō Latgolas īla) Lōča izdevnīceiba atvēre grōmotneicu, pats papyldynōja zynōšonas žurnalistikā i tautsaimnīceibā Latgolas Tautas universitatē Rēzeknē. Vālōk, 1940. godā, nūsadybynojūt padūmu varai, pi okupacijas īstōdem meklēja īspēju dybynōt Latgolas augstskūlu.
Kaidam byut pīminekļam — tys tyka izvērtēts skiču i maketu konkursā. Uzvarēja daugavpilīša Ivo Folkmaņa variants. Pīminekļam byus simboliska nūzeime. Vēstures vātrōs pasauļs tyka saškalts. Vīna daļa — dzimtine, ūtra — trymda, obōs ir dorbōjīs Vladislavs Lōcs. Pīminekļa veidolā — pōrškalts akmiņs ar plaisu vydā, i kai tylts pōri — atvārta grōmota, a pošu plaisu pylda yudiņa olūts kai dzeiveibas i myužeibas simbols. Olūts veidōts nu bīza stykla, izgaismojūt atgōdynōs gaiši zylu yudiņa straumi. Ari pīminekļa nūsaukums byus “Olūts”. Uz zemes ar pacālumu iz pīminekļa pusi nūsavītōs plōksne ar šaidu tekstu prof. Pītera Stroda ortografijā:
“Olūts
Veļtējums Vladislavam Lōčam
1912 — 1984
latgalīšu drukōtō vōrda izdevējam.”
Tei ir raksteiba, kurā vysa myuža garumā Vladislavs Lōcs izdeve grōmotas, avīzes, žurnalus itt. Itōs raksteibas aizstōve, sorgōtōja i kūpēja beja Vladislava Lōča izdevnīceiba.
Vēļ jōizstrōdoj pīminekļa teritorijas lobīkōrtōšonas projekts. Leidz tam jōizpylda daudz i dažaidi projekteišonas nūsacejumi, kūpumā 21. Ari itūs nūsacejumu izpiļde praseis papyldu leidzekļus.
Pīminekļa i teritorijas lobīkōrtōšonai nu Saeimas deputatu kvotom pīškērti 18 000 eiro plus privatā ceļā savōkta summa — 2955 eiro.
Ar pīmiņas zeimes atklōšonu Vladislavam Lōčam 18. novembrī īsasōksīs 100-ais gods nu vaļsts proklameišonas. Tiks demonstreita dokumentalō filma Vladislava Lōča pīmiņai, kas byus skotama pasōkuma laikā.
Par augšōk izklōsteitū grybātu dzērdēt ari cytas dūmas voi īrūsmes.
Pīters LŌCS
Komentāri