Vasala, Plōciņu Maseit!
Nu kai napasaceit, ka myusim tok vaļsts aizsardzeiba pyrmajā vītā.
Nu tod Donets sōce: “Bārnu vacōki daudzi reižu gudrōki nakai specialisti ar vairōkom augstōkajom izgleiteibom. Kai soka angli: “Mes naasom cik bogōti, lai lātu pērktu.”
Vacōki bārnim tūs lobōkūs spaneišus un lōpsteņas pērk, na lātōkūs. A vaļsts pōrvaļdeitōji kū dora? Sovim aizstōvim saperlōpsteņu izstrōdōjumus pērk. Imitaceju. Kai Edgars Līpeņš sovulaik saceja: “Pakaļdarynōjumu.” Na veļti ņaudēja par kara draudim, laikam zynōja gudreibas beņči, kū saldatenim īmōzōjuši. Taidu nakvalitativu pakaļdarynōjumu, ka pīcu minotu laikā salyuza 14 saperlōpsteņas. Pi tam daļa soldotu atsasaceja jau sōkumā nu rakšonas ar taidom šupleitem. Laikam zynōja, kur tys suņs aprokts.”
Nu itamā vaļstī nikod garlaiceigi nabyus. Napaspēju vēļ itai vēstulei pīlikt punktu, kai 4. majs klōt un Pļapatunu Donets taipat. Jys sōce: “Kū tī par saimes kļyudom raudōt? Tys mudri davess da saimes lūgu dauzeišonas. Reizi jau krizes laikā beja. Pi tam mes naasom par peseresa atjaunōšonu. Myusim nav vajadzeigas vysaidas revoļucejas.
Tikai smīkls i bāda. Par tom pošom saperšupleitem. Labi, ka kars nasasōce, tikai mōceibas beja. Tod to byutu taida kļyuda, ka naleidzātu ni lobōšona, ni golvas sačeršona un skraideišona pa saimes nomu.
Mes asam par vīnu taisneibu un vīnu lykumu vysim. Jo byus pōrtykuse tauta, labvēleigi dzeives apstōkli, tod nikaida propaganda naleidzēs. Ļaudis ar plintem rūkōs byus gotovi aizastōt par sovim labdarim.”
Es Donetam pīkreitu.
Pļōpu Pīters
Komentāri