Tikai 10 dīnas palykušas leidz vēsturiskajam nūtykumam, kod Dīva vītnīks Zemes vērsā svēteis Mōras Zemi Latgolu, Latviju, ari Igauniju un Lītovu.
Latvijas veiskupu īteikums ir, gaidūt Svātū tāvu, palaseit pāvesta rokstus, veikt lobdareibas dorbus, paleidzēt gryuteibōs nūnōkušīm, pīsadaleit ekumeniskajūs dorbūs, izmontōt socialūs teiklus
un, pyrmkōrt, lyugtīs, lyugtīs personeigi un kūpā par pāvesta viziti.
LYUGŠONAS PAR PĀVESTU
- Kungs Dīvs, kas sovu kolpu Francisku, apostola Pītera pēcteci, esi izavēlējīs par vysu ticeigūs gonu, uzklausi myusu lyugšonas, lai jys kai Kristus vītnīks zemes vērsā styprynōtu sovus ticeibas brōļus. Paleidzi myusim vysā Bazneicā saglobōt saskaņas, mīlesteibas un vīneibas goru, lai visi cylvāki Tevī atrostu patīseibu un myužeigū dzeiveibu. Kungs Jezu, ar sovas dīvišķōs sirds gōdeibu sorgoj myusu pāvestu Francisku. Esi jam gaisma, spāks un īprīcynōjums! Lyudzam, lai pāvesta Franciska vizite Baltijas vaļstīs nas myusu zemei svēteibu, veicynoj goreigū atmūdu un cylvākus pamudynoj atsagrīzt pi Dīva! Mes Tevi lyudzam, Dīvs, myusu Kunga Jezus Kristus vōrdā, kas ar Tevi dzeivoj un volda myužu myužūs. Amen.
- Kungs Dīvs,Vysusvātōkō Trejsvīneiba! Mes pasateicam Tev par Tovu svātū Bazneicu un par vysom žēlesteibom, kū Tu ar tōs paleidzeibu myusim namiteigi dōvoj! Tu esi teicis: “Lyudzit, un jyusim tiks dūts!” Gaidūt Tova kolpa pāvesta Franciska viziti myusu zemē, mes pazemeigi un ar paļōveibu lyudzam: Paleidzi myusim atjaunōt myusu zemi, rūsynōt myusūs vēlēšonūs cīšōk turētīs pi Tevis — ar ticeibu, prōtu, grybu un sirdi! Apgaismoj myusu prōtu, lai tys meklej Tovu patīseibu un spēj tū atškērt nu puspatīseibom un moldym! Lai tys turīs pi patīsom vērteibom un nasaļaun kārdynōtōja viļteibom! Styprynoj myusu grybu, lai mes gryuteibōs un pōrbaudejumūs nanūsavārstu nu Tevis. Škeistej myusu ticeibu, myusu atmiņu un kulturu, lai mes napasadūdam sekularisma, patērēšonas un dažaidu ideologiju goram! Un it īpaši pasorgoj nu tō myusu jaunīšus! Paleidzi kotram cylvākam izlyugt žēlesteibu nūžālōt grākus un lyugt pīdūšonu! Dūd myusim spāku Latvijas symtgadē atsagrīzt pi Tevis, lai naapmīrynōteibas, nasaskaņu un tyvredzeibas vītā stōtūs pateiceiba, vīnoteiba un dzeives gudreiba Tovā gaismā! It seviški lyudzam Tevi — atver sirdi un prōtu tim, kuri Tevi vēļ nepazeist. Lai jī, Svātō Gora vadeiti, atrostu ceļu pi Tevis! Tū vysu lyudzam Tev caur Tovu Dālu Jezu Kristu. Amen!
Komentāri