“TĀVU ZEMES KALENDARS 2026”

Godagrōmota ir izdūta ar Pētera Ragauša, Andra Gribuškas, Pētera Keiša, Olgas Vogules, Raimonda Krasinska, Jūlija Augusta Tropa, Jura Vanaga un Rēzeknes vaļstspiļsātas pašvaļdeibas atbolstu. Grōmotas vōkus rūtoj Leiksnas Vyssvātōkōs Jezus Sirds Romas katōļu bazneicas skots nu putna lidōjuma – Imanta Suveizda foto. Kalendaram ir vairōkas sadaļas. Sadaļā “Arheologija. Vēsture” varim laseit arheologa Jura Urtāna divus interesantus rokstus – “Laukazara apkōrtne senōtnē” un “Dzirkaļu piļskolnā”, kū papyldynoj fotografijas. Romas katōļu bazneicas prīsters, Aizputes Nūvodpētnīceibas muzeja pētnīks un mōkslas eksperts Andris Vasiļevskis stōsta par dažim Stērnīnes bazneicas liturgiskajim tārpim. “Pīvērstīs senūs bazneicas tārpu izpētei mani pamudynōja Nacionalō kulturas montōjuma pōrvaļdes ilggadejō mōkslas pētneica un vēsturneica Rūta Kaminska. Jōs pamudynōts, devūs uz Latgolu, lai atklōtu tur globōtōs vērteibas pats sovom acim,” tai prīsters roksta īvodā. Jys rokstā seikōk aplyukoj trejs 18.–19. gs. ornatus nu Stērnīnes bazneicas liturgiskūs tārpu krōjuma. Sovukōrt Marija Labanovska laseitōjus aizvad uz Krōslovas nūvoda Šķaunes pogostu un īpazeistynoj ar Landskoronas Sv. Trejsvīneibas bazneicu. Ūtrs Marijas Labanovskas roksts ir par pyrmajom latvīšu skūlom Latgolā un Kōrsovas apkaimē. Zylupes draudzes prāvests Vitālijs Filipenoks šamā nūdaļā publicējis rokstu par Istras Jaunovas Marijas Bezvaineigōs Ījimšonas Romas katōļu draudzes bazneicu. Vysvairōk rokstu ir sadaļā “Kulturvēsture. Personeibas”. Te uzzynōsit gon par Ontona Skryndas un jō saimes dzeives ceļu, gon Jezupa Dyuras (1896–1972) dzeives gōjumu, gon rakstnīku Ontonu Rupaini un tū, ka žurnalam “Katōļu Dzeive” ir 100 godu jubileja. Ieva Zuicena rokstā “Veneranda Zepa un jōs literarū dorbu izlase “Ķīvītes balss” sirsneigi stōsta par sovu māmeņu Venerandu Zepu un jōs dzeivi. Rokstā “Muns boltais klūsters” kino režisors, Rēzeknes Gūda piļsōņs Jānis Streičs stōsta sovas atmiņas par bērneibu, par Rēzekni, par mōceibom Rēzeknes Pedagogiskajā skūlā, par tim dzeives breižim, kas jū ir vaduši uz šū piļsātu.

Pilnu tekstu lasiet “RV” 06.01.2026.