Jau nu pošim pyrmsōkumim – 1990. goda – LKC izdevnīceibas vadeišonu uzajēmēs Jōņs Elksnis. Sarunvolūdā šū izdevnīceibu bīži sauc tōs vadeitōja J. Elkšņa vōrdā. J. Elksnim interese par grōmatnīceibu rodōs jau bērneibā, kod jys dzērdēja nūstōstus par Drycānu muižnīku G. Manteifeli, kurš latgalīšu volūdā beja izdevis kalendarus. Tys zinomā mārā rūsynōja ari J. Elksni kļyut par grōmatnīku. Vysu sovu myužu J. Elksnis ir veļtējis latgalīšu volūdas un literaturas popularizēšonai. Jō dorbs ir nūvērtēts ar Treju Zvaigžņu ordeni (1994) un Latvijas Vaļsts aizsardzeibas fonda Gūda zeimi (2003), jys ir Rēzeknes Gūda piļsōņs (2004), bolvas “Latvijas lepnums 2013”, kai ari grōmotu mōkslas konkursa “Zelta ābele 2017” gūdynōšonas bolvas par myuža īguldējumu grōmatnīceibā īgivējs. 30 godu laikā izdevnīceibā J. Elkšņa vadeibā izdūti vairōk nakai 500 dažaida satura izdavumi – brošuras, bukleti, grōmotas latvīšu, latgalīšu, krīvu un angļu volūdā. Vīna nu pyrmajom LKC izdevnīceibas izdūtajom grōmotam beja Ontona Rupaiņa romans par latgalīšu atmūdu Pīterpilī 19. godsymta 90. godūs “Tauta grib dzeivōt”. Lai veicynōtu laseitprasmi, tyka izdūts Ontona Rupaiņa garstōsts “Jaunō skūlōtōja”, Madsolas Jōņa stōsts “Ausmas zeme”, Jōņa Klīdzēja stōsti “Gōjputnu dzīsme”, Norberta Neikšānīša romans “Myurakolns”. Par gūdu Nikodema Rancāna pīminekļa atklōšonai Rēzeknē LKC izdevnīceibā topa rokstu krōjums “Nikodems Rancāns”. Ar rēzeknīša Pītera Keiša atbolstu iznōce Franča Trasuna “Dzīve un darbi” trejūs sējumūs, kū izdūšonai beja sagatavōjis profesors Pēteris Zeile. Ar radinīku atbolstu 1999. godā izdūts Andriva Jūrdža “Myužeigais kalinders” ar filologijas doktores Annas Stafeckas īvodu. LKC izdevnīceibā izdūtas vairōkas profesora Pītera Zeiles grōmotas: “Osvalds Zvejsalnieks no Zvejsalām”, “Latgales kultūras vēsture”, “Meistars no Ušpeļu dzimtas”, “Latgales glezniecība” u.c. Nūzeimeiga ir mōkslas zynōtnīka Jōņa Pujāta grōmota “Latgales keramika”, kas izdūta 2002. godā. 30 godu laikā LKC izdevnīceiba ir izdavuse daudz grōmotu par vēsturi, kulturas vēsturi, religiju, mōkslu, vairōkus pētejumus par apdzeivōtom vītom, pīmāram, Varakļōnim, Viļaku, Eglaini u.c. LKC izdevnīceibas lapnums ir kulturvēsturiskō un literarō godagrōmota “Tāvu zemes kalendars” un literaturas almanahs “Olūts”. Izdevnīceibā teik izdūtas grōmotas ari krīvu volūdā: latgalīšu autoru dorbu tulkōjumi (J. Pavlovska dorbi bazneicas vēsturē, F. Trasuna dzeja un fabulas), originaldorbi (J. Šešoļina un V. Aņisimovas dzeja, K. Hendeļa proza, I. Sircova memuari u.c.). LKC izdevnīceiba ir vīns nu lelōkajim un stabilōkajim bibliotekas sadarbeibas partnerim, nu kura dōvynōjumā teik sajimtas praktiski vysas tymā izdūtōs grōmotas. Rēzeknes Centralō biblioteka sveic izdevnīceibu 30 godu jubilejā un vysu laseitōju vōrdā pasateicās par grōmotu dōvynōjumim! Vysas dōvynōjumūs sajemtōs grōmotas ir pīejamas myusu laseitōjim. Laipni gaideiti bibliotekā!
Dzidra GERMOVA,
Rēzeknes Centralōs bibliotekas vacōkō bibliografe
AUTORES foto
Komentāri