28. aprelī akademiskōs un profesionalōs sferas ekspertu diskusijas nūslēgs četras prezentacijas, rōdūt pētnīceibas rezultatu. Akademikis, arheologs Juris Urtāns (Latvijas Kulturas akademija) vēsteis par unikalu un Latgolas kulturvēsturi aktivam tūrismam veicynūšu faktu, tik jōatrūn pareizōs pasnēgšonas formas. Četru godu laikā Latgolā ir atrosti 49 jauni piļskolni. Profesors gatavoj jaunu izdavumu par piļskolnu vēsturi, tū atklōšonas un vōrdu dūšonas prīcu. Diāna Apele (Rēzeknes Tehnologiju akademija) sadarbeibā ar Valentinu Siņakovu (Daugavpiļs Byuvnīceibas tehnikums) un žurnalisti Marutu Latkovsku ir sagatavōjušas atkōrtōtai izdūšonai izcylōs kulinares Antoņinas Masiļūnes povōru grōmotu. Grōmotas receptes ir labi parōdejušas sevi Latgolas kulinarajā montōjumā, tagad byus īspēja 1992. goda pyrmū un latgaliski vīneigū povōru grōmotu īraudzeit nu jauna. Rēzeknes Tehnologiju akademijas docātōju un studentu, tymā skaitā absolventu, kūpeigā dorbā ir sagatavōts izdavums bārnim un pyrmsskūlai. Dzejneicas Inetas Atpiles-Juganes grōmateņai “Burtu vuoceleite” ir pōrdūmōts mōkslinīcisks nūformējums (Ieva Širiņa) un tagad meklej sovu mozū laseitōju. Ar grōmotas mōkslinīciskū koncepciju īpazeistynōs asociātō profesore Aina Strode. Lūznovas muižas pōrvaļdneica Iveta Balčūne stōsteis par muižu montōjuma lelū lūmu tradiciju saglobōšonā un tīšū sakaru ar konkretas geografiskōs vītas dzeives kvalitates ceļšonūs. Aplīcynōjumam tiks rōdeita Lūznovas un Lelbornes muižu dzeive myusu dīnōs. Aktualō informacija par Latgolas kongresu atrūnama mōjaslopā:
.
Komentāri