Vasala, Plōciņu Maseit! Vēļ vacajā godā gribu kū uzraksteit. Mes ar Pļapatunu Donetu sateikam labi, tikai ar tū pareizū laika tērēšonu ir nadaudz gryušōk. Bet cerams, ka ari tī vyss byus labi, jo nagaideišu Jaunū godu. Kod daudzi, kuri sōc vysu kū nu jauna, tīpat īstrāgst par tū, ka nav pīredzes. Kur tei pīredze lai jemās, ka tikai reizi godā jū pīlītoj. Un tys ir goda sōkumā.
Te beja kū pībiļst ari Donetam: “Jo kū gribi dareit, tod dori. Kod nasaīt, meklej paleidzeibu voi apsastōj un padūmoj, par kū naizadeve. Un sōc nu jauna.
Vysu laiku dareit un prokrist cauri, tys tak nav dzeives mērkis, voi na tai, Pīter?”
Te maņ atlyka Donetam tikai pīkrist. Par tū, ka pošam tai ir dzeivē gadejīs. Koč ir bejuši naizbāgami apstōkli, darēju sovu doramū. Dēļ tō ari šudiņ es naprūtu sovaižōk dzeivōt. Speciali nasaucu lītu eistajā vōrdā, par tū, ka pīteik pošam dūmōt par tū un byut nūmūdā. Te ir tikai pīmārs tam, ka ari es naasu nikaids vysuvaronais un pareizais.
Jaunā godā visim svēteibu un vysu pōrejū Dīvs sagōdōs, jo tikai byutu ticeiba. Tev, Maseit, un visim citim vēleju prīceigus Zīmassvātkus un laimeigu Jaunū 2020. godu!
Pļōpu Pīters
Komentāri