Vīns nu nūzeimeigōkajim Latvijas vaļsts dybynōšonas aizsōkumim ir Latgolas kongress 1917. godā. Tō laikā pyrms 100 godim Rēzeknē nūtyka pyrmō demokratiski īvālātu Latgolas latvīšu pōrstōvu sanōksme, kurā tyka nūlamts, ka Latgolas, Vydzemes i Kurzemes latvīši ir vīna tauta, i Latgolai jōapsavīnoj ar pōrejim tūpūšōs Latvijas vaļsts nūvodim vīnā zemē. Latgolas kongresa symtgades reikōšona īsazeimej kai vīna nu byutiskōkajom nūtikšonom Latvijas symtgades atzeimēšonas programā, informej Kulturas ministrija. Itō pasōkuma veiksmeigai sagatavōšonai i nūrises nūdrūšynōšonai vajadzeiga vaļsts, pošvaļdeibu i navaļstisku organizaciju sovstarpeja sadarbeiba, par tū Kulturas ministrijas Latvijas vaļsts symtgades birojs veidōs Reiceibas grupu. Latgolas kongresa symtgades Reiceibas grupā dorbōsīs pōrstōvi nu Latgolas lelōkajom pošvaļdeibom, augstskūlom, kulturas institucijom i aktivōkajom navaļstiskajom organizacijom. Pyrmō sasatikšona beja 2. junī Rēzeknē, kuras laikā kulturas ministre Dace Melbārde īpazeistynōja ar ministrijas vīziju par Latvijas symtgades nūtikšonom, sovukōrt klōtasūšī pōrstōvi dalejās ar sovom pōrdūmom i redzējumu par nūtikšonom Latgolā symtgades programas ītvorūs.
VEIDŌS REICEIBAS GRUPU
Kulturas ministrija uzsōkuse aktivu dorbu pi Latvijas symtgades svātku programas izstrōdes. Tōs ītvorūs planōts izveidōt Latgolas kongresa symtgades Reiceibas grupu.
Komentāri