Vasala, Plōciņu Maseit! Itū reizi Pļapatunu Donets sōce par budžetu: “Ka dzārōjam pītryukst naudeņas, tū vēļ var saprast. Jam nabyus gona leidz tam laikam, koleņc nu alkagola gola nadabōs. Nu, bet, Pīter, kai saprast tū, kas nūteik ar vaļsts budžeta maisa caurumu, es nazynu. Pētejūt vaļsts pōrvaļdeitōju naudas pajimšonas īspējas nu maisa, pots nalobais voi smuts golvu izmežgeis.
Kaida jāga nu daudzom izgleiteibom un dorbim, ka pošu golvonū namōk izdareit. Godi īt, cylvāki mainōs, bet golu golā, pi lemšonas tikai naprašas. Kas ni atīt, navar maisu aizlōpeit. Visi kai vīns, namōk rēkinōt skūlas sōkuma klašu matematiku. Navar tai sarēkinōt, ka naudeņa maisā palyktu pōri, navys pītryuktu.”
Es Donetam vaicōju: “Kū tu soki par jaunu krizi?”
Donets atbiļdēja: “Es tū zynu. Na pyrmū reizi un na pādejū tys tai bejs. Myusu vysulobōkō draudzine Gryža aba Krize seņ nabeja pi myusu cīmūs. Kas cyts, ka na tī, kas saimī un vaļdeibā, komisejōs strōdoj, par tū pasaryupēs.
Kas myusim atlīk? Gūdam sagaideisim itū “gašku”, lai pēc tam varātu otkon prīcōtīs par jaunu veiksmes stōstu. Vysu laiku tok navar labi byut. Vajaga šaļtim i švaki padzeivōt.”
Tai ka, Maseit, moz tycams, ka dzeivē kas maineisīs.
Byus kai viņu reizi. Pasaceis, ka na pyrmū reizi ar peipi iz jumta un cauri tam prokriss tamā pošā šaļtī.
Pļōpu Pīters
Komentāri