Vasala, Plōciņu Maseit!
Lelais svātku trikmīņs beidzēs. Ari sūmozgu laisteišonas laiks ir cauri. Taipat kai vēlēšonu pestivals. Viņ Saimas jaunō slūta nikai navar tikt pi slauceišonas. Nu vacōs koalices pōrstōva izskaneja, ka ambicejas lelas, bet matematikas nav.
Pļapatunu Donetam vaicōju: “Ko ta lelī matematiki navarēja tik ilgi budžeta maisa mozū caurumu aizlōpeit?”
Jys maņ atbiļdēja: “Kū tu! Kas tod vysu laiku sev kabatu izmārus palelynōs? Tī jōmōk strōdōt. Apsamaineitīs ar pīredzi, kai lobōk un naradzamōk tū izdareit. Kai mozōk palelynōt un, golvonais, kai pēc īspējas mozōkā kabatā salikt pēc īspējas vairōk naudas.”
Es pībyldu: “Jaunō slūta ari nateik pi slauceišonas.”
Donets saceja: “Un natiks. Varbyut pat ilgi. Kai to sova ītekme jaunajā vaļdeibā jōsagloboj. Saimā taipat. Tikai poši sovu ītekmi pyrms vēlēšonom pagaisynova, tautai rōdeidami demokratijas paraugstuņdi, kū vēlētōji atbylstūši nūvērtēja īlykdami attīceigu atzeimi.”
Tai nu tys ir. Plōciņu Maseit, kai poša pōrsalīcynōji. Vēlēšonas ir nūpītns process, kur nūpītni teik izvērteits dorbs. Mes tok asom dorba devēji partijom. Voi na tai?
Palīc vasaliņka leidz cytai reizei.
Pļōpu Pīters
2018. goda 7. decembris
Komentāri