Vasala, Plōciņu Maseit!
Te otkon mes ar Pļapatunu Donetu sasatykom un jys maņ īsoce runōt drusku murgaini. Nūdūmovu, lai īt. Vēļōk saprassit taipat kai es.
Donets saceja: “Zini, kū vajag dareit. Vysim, kuri sovetu laikūs dabōja kaidus “tautas skotuves mōkslinīka” titulus, olimpiadēs medaļas un tai tōļōk, navajag saukt par Latvijas sasnāgumim. Voi ta jī tū vysu nadabōja peeseresa sastōvā? Taitod tai varai kolpōja. I taidim vēļ pīškir Treju Zvaigžņu ordeņus.
Ar kū jī atsaškir nu vīnkōršīm dorba cylvākim? Tīm to peņsejas mozas, kuri komunistu vaļdeišonas laikā strōdova. Kur te ir vysim vīna taisneiba — vysim vīns lykums? Pareizōk sokūt, izīt tai. Dažim nūpalny, vysim citim — piga. Pat Černobiļā pabejušī cylvāki nasajem tō, kas jim pīsanōkās. Jo naudas tryukst, tod tai ari jōpaskaidroj, dēļ ko tōs nav. Ar vysim skaitlim un faktim. Lai vysi saprostu, kur naudeņa palīk.
Navajag, pi varas asūt, izdūmōt vysaidas glupeibas, kaidas pat bārnudōrza bārni naizdūmoj, un pēc tam tōs pōrtaiseit par nūpītnim lykumim.
Dēļ kō lykumdūšonā tik daudz dumeibu? Dēļ to, ka spākā bīži vīņ stōjās navys lykums, bet kōrtejō dumeiba ci glupeiba, par lykumu, labi un pamateigi izstrōdōta, car saimes komisejom izgōjuse.”
Nu kū. Vo, cik nalabi izīt, ka tōs dumeibas ci glupeibas stōjās spākā. Vajag kū ta nūzagt. Kū ta atmozgōt. Kai ta atsarunōt. Golu golā, najēdzeibu pōrvērst lykumā.
Taids, Maseit, myusim, mērsteigīm, tys myužeigais skaistums.
Pļōpu Pīters
* * *
Myusu meilō Plōciņu Maseite,
Myužeigō skaistuma pučeite,
Pastōsti, kai Jōneišus pavadēji,
Voi papardeiti apraudzēji?
Varbyut zīdeņu tamā pamaneji?
Ja tū zīdeņu nūplyuci,
Sev pi jaceņas pīspraudi,
Tod vyss uz lobu piļdeisīs,
Pat gimines pīaugums radeisīs.
Maseit, esi uzmaneiga,
Nu vysom pusem pīsardzeiga,
Činaunīkus cyldynoj,
Myužeigu skaistumu tim dōvynoj!
Tod lelu laimi īgiusi,
Pat deputates krāslu montōsi.
L. KALNEJA
Komentāri