Myusu Latgolas patriots, Vladislava Lōča latgaļu rokstu muzeja dybynōtōjs Pīters Lōcs myužeibā aizgōja junijā. Jys vysus sovus spākus veļtēja muzejam, strōdōdams idejas vōrdā, lai saglobōtu un nūdūtu latgaliskū montōjumu nōkamajom paaudzem. Kas tagad nūteik ar šū muzeju? Kai pastōsteja vīns nu Vladislava Lōča latgaļu rokstu muzeja fonda pōrstōvim (sovu vōrdu jys lyudze napubliskōt), tod 25. septembrī nūtyka goreigūs materialu pōrvešona nu Pītera Lōča dzeivesvītas Purva īlā uz muzeja telpom Krōslovas īlā. Ka gon fonds, gon Pītera Loča radinīki asūt izlāmuši, ka visim materialim jōbyut vīnā objektā. Tagad muzeja telpōs Krōslovas īlā ir īreikōta uguņsdrūšeibas un pretīlaušonōs signalizacija. Taipat fonds plānoj īgōdōt aparatu, kas mozynoj mytrumu telpā. Bet ir problema – pagaidom nav atrosts cylvāks, kurš apkurynōtu muzeja telpas. Kas atsatīcās uz poša muzeja liktini, runōt ir pōragri, jōgaida, kod Pītera mantinīki sakōrtōs īpašumtīseibas, teice fonda pōrstōvis. Jōpībylst, ka fonds beja izveidōts, lai paleidzātu Pīteram Lōčam startēt kaidūs projektūs. Fondā dorbojās Agris Bitāns, Pīters Aloizs Ragaušs, Juris Viļums, Harijs Bernāns u.c.
Aija MIKELE-STRUŠELE
Komentāri